Энэ жилийн УИХ-ын сонгуульд ялалт байгуулж төр түшилцэхээр сонгогдсон 76 гишүүнтэй ард түмэн сайн танилцаж амжаагүй л яваа байх. Учир нь өнөө жил олон “битүү морьд” төрсөн гэж хэлж болно. Шинэхэн гишүүд өчигдөр тангарагаа өргөж албан ёсоор УИХ-ын гишүүн болов.
Тэдний дотор эгнэшгүй их хүчтэй аваргууд ч байна, эх орон ижий аав элгэн саднаа магтан дуулсаар гавьяат цол авсан дуучин ч байна, “Болор цом” яруу найргийн эзэд ч байна, төрсөн эгч дүүс ч байна, улстөр судлаач, түүх судлаач, инженер гээд салбар салбарын мэргэжилтэй гишүүд олон байна. Түүнээс гадна Лувсан овогтой гурван гишүүн байгаа бол ижил нэртэй 11 гишүүн байна.
Шинэ бүрдсэн парламетанд зулай зулайгаа гишгэж төрсөн эгч дүүс төр түшилцэхээр түмэн олноосоо сонгогдсон байгаа түүхэнд тэмдэглэгдэн үлдэх ховор аз завшаан боломж бололтой шүү. Өөрөөр хэлбэл, нэг айлын хоёр хүүхэд парламентад сууж байгаа анхны тохиолдол гэж хэлж болно.
Тодруулбал, УИХ-ын гишүүн “Мон-Уран”-ы Б.Наранхүү Дундговь аймгийн 16-р тойрогт Ардчилсан намаас нэр дэвшиж, харин түүний төрсөн эгч Б.Саранчимэг Монгол Ардын Намаас Баянзүрх дүүргийн 51-р хороонд нэр дэвшин ялалт байгуулсан билээ.
Ийнхүү эгч дүүс УИХ-ын чуулганы танхимд мөр зэрэгцэн сууна. Б.Наранхүүгийн хувьд 2012 оны сонгуулиар “УИХ-ын сонгуулиар гишүүн болсон. Харин түүний эгч Б.Саранчимэг Үндэсний цэцэрлэгт хүрээлэнгийн захирлаар ажиллаж байсан гэдгээр нь олон түмэн андахгүй сайн мэднэ.
Энэ мэтчилэн Батсүхийнх гэх айлын охин, хүү хоёр анх удаа парламентын танхимд хамтдаа суухаар болов. Б.Наранхүү гишүүний хувьд чуулганы хуралдаанд ховорхон суудаг, “хэлгүй” гишүүдийн тоонд зүй ёсоор ордог.
Тэрбээр “Намайг дахин сонгосон Дундговьчууддаа баярлалаа. Та бүхнийхээ итгэлийг дааж ажиллана. Эгчтэйгээ цуг нэг танхим сууна гэхээр их сонин байна. Эгчдээ амжилт хүсье” гэжээ. Хэдий хоёр өөр нам гэлээ ч чуулганы хуралдаандаа суух нь тун ховор, хурдан морьдоо байнга эргэдэг гишүүн Б.Наранхүүд төрсөн эгч Б.Саранчимэг нь энэ дөрвөн жилд их тус нэмэр болно гэдэгт ард түмэн ихэд итгэлтэй байгаа ажээ.
Дашрамд дуулгахад, өмнөх парламентад нэг айлын баз хүргэнүүд төр түшилцэж байсныг сайн санах байх. Тодруулбал, МАН-ын Бүлгийн дарга С.Бямбацогт, УИХ-ын гишүүн Д.Батцогт хоёр нэг айлын хүргэчүүл байсан билээ.
О.Сайхан
