Moderator: mgl_300
Бичлэгийн тоо 42,366
Өвөл болж хүйтний улирал наашилж ханиад томуу, амьсгалын замын өвчний гаралт нэмэгддэг. Нярай хүүхдийн өвчлөл, түүнээс хэрхэн урьдчилан сэргийлж болох талаар Нялхсын клиник сувиллын сэргээн засах эмчилгээний тасгийн эрхлэгч Д.Туяатай хийсэн ярилцлагыг хүргэж байна. -Өвлийн улиралд нярайн өвчлөл нэмэгддэг. Үүнээс эцэг эхчүүд маань хэрхэн урьдчилан сэргийлэх вэ? -Манай орон эрс тэс уур амьсгалтай. Өвөлдөө их хүйтэрдэг учраас нярай хүүхэд их өвчлөмтгий байдаг. Сүүлийн үед амьсгалын замын гаралтай янз бүрийн ханиад томуу дэлгэрч байгаа. H1N1, шувууны ханиад, гар хөл амны өвчин гээд маш олон төрлийн ханиад нэмэгдсэн. Тиймээс нярай хүүхдийг ханиад томуунаас урьдчилан сэргийлэх зайлшгүй шаардлагатай байдаг. Үүнд эцэг, эхчүүд чухал үүрэгтэй. Хэрвээ хүүхэд эрүүл төрсөн бол ханиаднаас урьдчилан сэргийлэх бүрэн боломжтой. Харин эх, хүүхэд хоёулаа өвчтэй, янз бүрийн суурь тархи толгойн өвчтэй бол дархлаа нь суларч өвчлөмтгий болдог. Тиймээс юуны өмнө нярай хүүхдийг ханиад томуунаас урьдчилан сэргийлэхийн тулд гэр орондоо агаарын солилцоо байнга явуулж, чийгтэй цэвэрлэгээ хийх хэрэгтэй. Хэрвээ цаг агаар дулаан, хасах 10-аас доош хэмтэй байвал нярайг сайн дулаалж салхилуулна. Нярай хүүхдийг 14 хоногтойгоос нь эхлээд салхилуулж болдог. Гол нь гадаа гаргах цагаа бага багаар нь нэмж дасгадаг. Мөн гэртээ ариутгал цэвэрлэгээг байнга хийж байх нь чухал. Учир нь амьсгалын замын өвчин агаар дуслаар халддаг. Хэрвээ ханиадтай хүн байвал амны хаалт хэрэглэх шаардлагатай. Мөн нярай хүүхдийг элдэв өвчнөөр өвчлүүлэхгүйн тулд чийрэгжүүлэх дасгалыг хийлгэж занших хэрэгтэй. Ханиаднаас урьдчилан сэргийлэх есөн цэгийн дасгал гэж байдаг. Үүний зааврыг харьяа дүүрэг өрхийн эмнэлэг болон мэргэжлийн эмчээс авч болно. Мөн хүүхдээ чийрэгжүүлэхийн тулд иллэг массаж хийж, хар цайнд оруулж байвал урьдчилан сэргийлж чадна. -Сүүлийн үед нярайн шарлалт ихсэх хандлагатай байна гэж ярих болсон. Хүүхдийн бие юунаас болж шарладаг вэ? -Цэвэр физиологийн нярайн шарлалт гэж байдаг. Энэ тохиолдолд хүүхдийн шарлалт 7-14 хоногийн дотор өөрөө алга болдог. Харин шарлалт нь14-21 хоног байх буюу арилахгүй бол физиологийн эмгэг шарлалт гэж үздэг. Үүнийг тусгай биохимийн үзүүлэлтээр, цуснаас нь шинжилгээ авч оношилдог. Эмгэг шарлалтыг заавал эмийн эмчилгээ, шарлагын фото эмчилгээгээр эмчлэх хэрэгтэй байдаг. Нярай хүүхэд шарлах эсэх нь эх хүүхдийн өвчлөлөөс ихээхэн хамаардаг. Ээж нь янз бүрийн суурь өвчтэй, жирэмсэн байхдаа өвдөж, дутуу төрж байснаас болж хүүхэд шарладаг. Тийм учраас хүүхдийн шарлалт арилахгүй удвал өрхийн эмнэлэгтээ үзүүлж заавал эмнэлэгт хэвтэж эмчлүүлэх хэрэгтэй. Харин физиологийн шарлалтыг нярай хүүхдээ хөхөөр нь сайн хооллож, шингэн юм уулгавал аяндаа арилна. -Хүүхдийн живхийг харшил үүсгэдэг гэж ярих юм? -Орчин үед хүүхдийн живх буюу памперс бий болсноор хүүхдийг олон дахин хуурайлахгүй амар болсон. Энэ нь нэг талаар цаг хэмнэдэг ч зарим хүүхдэд харшил, улайлт үүсгэдэг. Гэхдээ манай уламжлалт сайхан аргууд байдаг. Хүүхдээ хуурайлж, хүүхдэд зориулсан тоснуудаас түрхвэл улайлт харшил үүсэхгүй. Памперсийг олон орноос оруулж ирж байгаа. Хүүхдийн биед харшил өгөхүйц хэт хөвөн материалаар хийсэн живх хүүхдэд харшил өгөх нь элбэг байдаг. Үүнээс болж хүүхэд харшлын суурь өвчтэй болох аюултай. Тиймээс аль болох даавуун материалтай живхийг сонгох хэрэгтэй. Эрүүл ахуйн шаардлага хангасан живхийг хэрэглэж занших нь чухал юм. Мөн хүүхдээ нэг настайгаас нь тосож шээлгэж сургах хэрэгтэй. Хэрвээ үргэлж живх хэрэглээд байвал хүүхдийн сэтгэхүй хөгжихөө больдог. -Хүүхэд төрөхөөсөө эхлээд ямар вакцинд хамрагдах ёстой вэ? -Хүүхэд халдварт өвчнөөс урьдчилан сэргийлэх шаардлагатай тодорхой тооны вакцинуудад хамрагдах ёстой. Хүүхдийг төрөнгүүт буюу 24 цагийн дотор гипатит, сүрьеэ, халдварт саагийн вакциныг хийдэг. Тэгээд 2-4 сартайд нь саа, тавт вакцин, 9 сартайгаас 2 настайд нь УГУ вакцинд хамруулдаг. Хоёрт вакциныг 7,15 настайд нь хийдэг бөгөөд ханиад томуу дэлгэрсэн үед вакциныг заалтын дагуу хийдэг юм. -Хүүхдийг хөхөөр хооллохыг чухалчилдаг. Эхчүүдэд хандаж юу хэлэх вэ? -Эхийн сүү хүүхдэд маш ач тустай. Сүүнд амин уураг гэж байдаг. Тэр уургийг хүүхэд төрөнгүүтээ заавал амлаж залгисан байх шаардлагатай. Энэ уурганд хүүхдийг насан туршид нь авч явах чухал амин дэм агуулагддаг. Ханиад томуу, элдэв халдварт өвчнөөс сэргийлэх бүх амин дэмүүд эхийн сүүнд бий. Ээжүүд хүүхдээ нэг нас хүртэл нь эхийн сүүгээр хооллох шаардлагатай. Үнэхээр хүнд өвчтэй өөрөө хөхүүлж чадахгүй бол хүүхдийн нэмэлт сүүн тэжээлээр хооллохоос өөр аргагүй . Гэхдээ сүү орохгүй ээж гэж ерөөсөө байдаггүй. Бүр болохгүй бол саасан сүүгээрээ угжих хэрэгтэй