Хүүхэд чинь таны хэвлийд, тас харанхуйд байсан шүү дээ. Тийм
болохоор нүд нь тааруухан хөгжилтэй байдагт гайхах хэрэггүй. Дөнгөж
төрсөн хүүхдийг харж буй зүйлийнхээ тодрох цэгийг тааруулах, урьд нь
үзээгүй хурц гэрэлд дасах, өнгө ялгах, амьдралдаа анх удаа харж байгаа
зүйлсийг ухаарах гээд маш хэцүү даалгавар хүлээж байдаг.
Хүүхдийн харах чадавхи том хүний харааны чадавхийн дөрвөн хувийг
эзэлдэг. Дөнгөж төрсөн хүүхэд өөрөөс нь ердөө л 25 см зайтай байгаа
зүйлийг тодруулан харж чаддаг байна. Энэ нь хөхөж буй хүүхэд эхийнхээ
цээжийг харж чадна гэсэн үг л дээ. Хүүхэд өнгө сайн ялгаж чаддаггүй.
Улаан, шар өнгийг амархан ялгадаг бол цэнхэр, ногоон өнгө адилхан
харагддаг. Хүүхэд бас бүдэг өнгө ялгахдаа их зүдэрдэг.
Таны хүүхэд юу сайн хардаг юм бол?
Тод ялгарсан, тэгш шулуухан ирмэгтэй энгийн зүйлсийг ойрын зайнаас
илүү тод хардаг. Цагаан цаасан дээр хараар зурсан геометрийн элдэв дүрс
түүний сонирхлыг татаж чадна. Бяцхан үр чинь бас нүднийх нь үзүүрт
харагдсан хөдөлгөөнтэй зүйлсийг их сонирхдог юм шүү.
Гэхдээ хүүхдийн хамгийн сонирхдог зугаа бол хүний царайг харах явдал
байдаг. Дөнгөж төрсөн хүүхэд сонирхолтой зүйлсийг тоохгүй, харин хүний
царайг нүд салгалгүй ажигладаг болохыг эрдэмтэд тогтоожээ. Хүүхэд
эхлээд хүмүүсийг нүүрнийх нь дүрсээр таньж, хэлбэр дүрсийг нь тогтоох
бөгөөд нарийн төрхийг нь анзаардаггүй.
Таны хүүхдийн харааны тогтолцоо хоёр сарын дотор үлэмж сайжирна.
Хүүхэд гурван сартайдаа хүмүүсийг ялгах болж, нүд, хамар, амных нь
хэлбэрийг анхааралтай ажиглаж эхэлнэ. Бас ээжийнхээ сэтгэл санааг
царайных нь байдлаар, төрөлхийнхөө зөнгөөр тааварлаж эхэлдэг. Ярвайсан
бол ээж нь дургүйцсэн байж таарна. Инээмсэглэж байвал ээж нь сэтгэл
хангалуун жаргалтай байгаа хэрэг. Үүнд хүүхдийн сэтгэл ч хангалуун
байдаг.
Таны хүүхэд зургаан сар хүрэх үед харах чадвар нь том хүний харааны
чадавхийн 10 хувь орчимд хүрч сайжирдаг. Тэр үед хүүхдийн чинь алсыг
харах чадвар хоёр дахин нэмэгдэж, хөдөлгөөнтэй зүйлсийг дагуулан хардаг
болно. Нэг нас хүрэх үед харах чадвар нь том хүний чадавхид дөхөж очно.
Гэхдээ энэ нь хараа бүрмөсөн сайжирсан хэрэг биш юм. Хараа сайжрах үйл
явц дахиад дөрвөн жил үргэлжилдэг ажээ.
Хүүхдийн эрхтнүүд хамтдаа ажиллахад суралцаж, түүний тархинд шинэ,
нарийн түвэгтэй холбоо үүсгэнэ. Цагийн юм цагтаа болдог нь мэдээж
боловч хүүхдээ илүү хурдан, өв тэгш хөгжүүлэх боломж танд бий.
Зөвлөгөө
1. Хүүхдийнхээ эргэн тойронд геометрийн зөв дүрстэй, хурц тод, бие
биеэсээ ялгарсан өнгөтэй эд юмс байлгахыг хичээ. Энэ нь тоглоомын тухай
томчуудын ойлголттой авцалдахгүй ч нялх хүүхдийн харааны хөгжлийн
онцлогт илүү үр дүнтэй.
2. Нялх хүүхэд хөдөлгөөнтэй биетийг их сонирхдог. Иймд худалдаж
авсан шинэ тоглоомыг хүүхэддээ харуулахдаа түүнд харагдах газар
хөдөлгө. Хүүхэд чинь эхлээд таны үйлдлийн хариуд эмх замбараагүй
хөдөлгөөн хийх боловч дагуулж харах чадвартай болно.
3. Орон дээр нь өлгөсөн шажигнадаг тоглоом болон зургийг байнга
солих буюу шинэ тоглоом нэмж бай. Өмнөх тоглоомондоо хүүхэд чинь дассан
болохоор шинэ тоглоомыг заавал анзаарах болно. Тоглоомыг сольсноор шинэ
сэтгэгдэл төрж, хүүхдийн идэвхтэй, өв тэгш хөгжилд тус дэм болдог.
Хооллолт
Хөхний сүү бол нярай хүүхдэд эхний зургаан сарын турш шаардагдах
бүхий л тэжээллэг бодисоор хангадаг шилдэг хоол билээ. Үүнээс гадна
хөхний сүү хялбархан боловсордог бөгөөд хүүхдэд тохирох хэмжээний
уураг, тос хүүхдэд нэн чухал ихээхэн хэмжээний лактоз агуулдаг. Бас
хангалттай хэмжээний аминдэм, амархан шингэдэг төмөр, макро болон бичил
махбодиуд байдаг. Мөн нянгийн халдвараас хамгаалдаг, нярай хүүхдийн
гэдэсний хөгжилд тустай дархлаажуулдаг, биологийн идэвхтэй бодисууд
агуулдаг.
Зөвлөгөө
1. Нярай хүүхэд төрснийхөө дараа эхийнхээ уургийг хөхдөг. Түүний хэмжээ бага хэдий ч их тэжээлтэй хоол юм. 2. Хүүхдийг хүссэн үед нь, хүссэн хэмжээгээр нь хөхүүлэх хэрэгтэй. Хүүхдийн жин нэмэгдэж байгаа эсэхийг шалгаж байгаарай. 3. Хүүхэд “суга өсөх” үедээ ердийнхөөсөө илүү олон хөхөж эхэлдэг. 4.
Хөхөлт үргэлжлэх хугацаа хүүхдийн нас, түүний зан авираас хамаарна.
Зарим хүүхэд шаардагдах сүүгээ тавхан мөчид сорчихдог бол зарим нь
45-50 мөчийн турш хооллодог. 5. Эрүүл хүүхэд шөнөдөө нэгээс
доошгүй удаа сэрж хөхөө хөхдөг. Шөнийн хөхүүлэлт бол шинээр төрсөн
хүүхдийн амьдралын чухал хэсэг юм.
Хөхүүл э |