Загасны махыг хэрхэн яаж хадгалах вэ
Загасыг цаасанд ороож хөргөгчид хоёроос гурав хоног хадгалж болно. Харин цөцгийн тос, өндөг, сүү, аарц гэх мэт өөртөө гадны үнэр амархан шингээх зүйлүүдтэй нэг дор хадгалаж болохгүй. Түүнчлэн халуун ажиллагаа хийхгүйгээр шууд хэрэглэдэг хиам, утсан мах, бяслаг зэрэг бүтээгдэхүүнтэй нэг дор байрлуулахгүй байх нь зүйтэй.

Будааг хөгцрөхөөс хамгаалах хэрэгтэй
Будааг гэрийн нөхцөлд сараас илүү хугацаагаар хадгалахгүй байх нь зүйтэй. Хадгалах орчин нь таван градус хүйтнээс таван градус дулаан, харьцангуй чийглэг 60-70% байх нь зохимжтой. Будааг том шилэн саванд хадгалах нь тохиромжтой. Хэрэв даавуун уут саванд хадгалах бол дээд өнгөн хэсэгт нь модны бага зэрэг нүүрс тавих хэрэгтэй. Энэ нь будааг янз бүрийн хорхой шавьж, чийг хөгц, гаж үнэрээс хамгаалдаг.

Сүүг ямар саванд хадгалах вэ?
Сүү хадгалах хамгийн тохиромжтой сав бол паалантай буюу шил, вааран сав юм. Сүүг аль болох харанхуй газар хадгалах шаардлагатай. Сэрүүний улиралд сүүнд бага зэрэг элсэн чихэр нэг литр сүүнд нэг халбага хийж буцалгавал хадгалах хугацааг уртасгана. Буцалсан сүүг таглалгүйгээр хөргөөх хэрэгтэй.
Гэрт хөргөгч байхгүй нөхцөлд сүүтэй саваа хүйтэн устай саван дотор байрлуулж нойтон алчуураар бүтээх нь зүйтэй. Энэ тохиолдолд алчуурын үзүүр ирмэгүүд нь хүйтэн усанд заавал дүрээстэй байх шаардлагатай.

Аарцыг шинээр нь уух хэрэгтэй
Аарцыг гурваас илүүгүй хоног хадгалж хэрэглэх нь тохиромжтой. Аарцыг хадгалалтын явцад исэхээс хамгаалж адил хэмжээний сүүтэй хольж зуураад нэг цаг орчим тогтонги байлгасны дараа сүүг марлиар шүүн авч, үлдсэн аарцыг хүнд зүйлээр /сайтар ариутгасан/ дарж тавьбал сайн байдаг. Мөн бага зэрэг давстай усаар норгосон цэвэр алчуурт боож тавьбал аарц хялбар мууддаггүй. Зөөхийг 0-8 градусын дулаантай байранд гурваас илүүгүй хоног хадгална.

Талхыг хэрхэн яаж шинэхэн мэт байлгах вэ
Талхыг таг бүхий паалантай саванд хадгална. Талхыг хэт чийглэг орчинд буюу хөргөгчинд хадгалж болохгүй. Талх хадгалах савыг долоон хоногт нэгээс гурван удаа халуун усаар сайтар угааж хатааж байх нь зүйтэй. Талхыг аль болохоор хатаахгүй байхын тулд алим, цэвэрлэсэн түүхий төмс, эсвэл бага хэмжээний нунтаг давсны аль нэгийг талх хадгалах саванд талхтай хамт хадгалж болно.

Өндгийг модон хайрцагт хадгалаарай
Өндгийг удаан хугацаагаар хадгалах шаардлага гарвал түүнийг аль болох цэвэр байлгах хэрэгтэй. Хэрэв хөргөгч байхгүй бол өндгийг хоёр градусаас доошгүй дулаанд зөөлөн хивэг бүхий модон хайрцаганд хадгална. Эсвэл хорин хувийн давсны / уусмалд /нэг литр усанд 200 гр давс уусгаж бэлтгэнэ/ хийж хадгална. Мөн хальсыг/ ургамлын тос юмуу өөхөн тосоор тосолж хадгалж болдог. Өндөг нь аливаа хурц үнэрийг өөртөө амархан шингээдэг тул загас мэтийн зүйлээс бол аль болох хол байрлуулах шаардлагатай.


Өмдний нугалаасыг удаан байлгахын тулд дотор талаас нь нугалаасыг дагуулаад савандаж байгаад индүүдэх хэрэгтэй.

Саарал өнгийн зуны костюм амархан хиртдэг учир зах, ханцуй, халаасны хирийг жирийн баллуураар үрж арилгана. Дараа нь сойздоно.

Цайны ханд, өндөг, сүүний толбыг глицеринээр арчаад дараа нь бүлээн усаар зайлна. Шинэ жимсний толбыг арилгахдаа эхлээд халуун сүү дусааж хэдэн минут байлгаад дараа нь бүлээн усаар угаана.

Зэвний толбыг арилгахдаа лимоны хүчлийг усанд уусгаж арчаад таван минутын дараа бүлээн усанд зайлж угаана. Сайн арилахгүй бол ууранд хэдэн минут байлгасны дараа хүйтэн усаар зайлж угаана.

Костюм, пальто, дээлний захыг цэвэрлэгч уусмалтай сойзоор толбыг арилтал үрж арчсаны дараа цэвэр усанд сойзоо дүрж арчина.

Костюмаа өлгөхдөө мөрөн дээгүүр нь даавуугаар бүтээж байвал тоос дарахгүй, өмсөхдөө чийгтэй сойзоор жигд цэвэрлэж арван минут орчим өлгүүрт өлгөөд чийгтэй даавуу тавьж индүүднэ. Дараа нь хуурай сойзоор арчвал өнгө нь сайхан болно.