КАЛЬЦИ. Ясаар хийсэн хүнсний бэлдмэл, гурил, ногоон навчит хүнсний ногоонууд, амьтны элэг, сүү, сүүн бүтээгдэхүүн, бурам, самар, загасны мах, сардин загас, далайн ногоо, дали, наранцэцгийн үр, шар буурцаг зэрэгт агуулагддаг.
Хэрвээ кальци дутагдвал гар, хөл бадайрч, хумс хугарамтгай болох, яс сийрэгжих, толгой өвдөх, зүрх дэлсэх, даралт ихдэх, нойргүйдэх, цочимтгой болох, булчин шөрмөс татах, сандрах, гэнэт түгших, шүд хэврэгших, хугарах зэрэг шинж тэмдэг илэрнэ.

ХРОМ. Алим, шар айргийн хөрөнгө, хар перец, элэг, тахианы мах, сүү сүүн бүтээгдэхүүн, жимс, усан үзэм, ногоон навчит хүнсний ногоо, зөгийн бал, мах, мөөг, самар, хавчны мах, төмс, хатаасан үзэм, цагаан гаа, хөрсөн дор ургадаг хүнсний ногоонууд, далайн гаралтай хүнс, эрдэнэ шиш, хөх тарианы гурил зэрэгт илүү байдаг.
Хром дутагдвал дархлалын системийн үйл ажиллагаа суларна. Амархан ядарч, аминхүчлийн зохицуулга алдагдах, халдварт өвчинд өртөмтгий болох, цусан дахь холестрин, сахарын хэмжээ багасах, сэтгэцийн эмгэг илрэх зэрэг шинж тэмдэг мэдрэгдэнэ.

ЗЭС. Алмонд самар, авокадо, бразил самраас их хэмжээгээр авч болно.
Энэ төрлийн эрдэс хүний биед дутагдвал цус багадах, үе мөчөөр өвдөх, судас хатуурах, үс халцрах, бамбай булчирхайн үйл ажиллагаа алдагдах, яс сийрэгжих, ядрамтгай болж, булчин өвдөх зэрэг шинж тэмдэг илэрдэг.

ТӨМӨР. Алмонд самар, далайн ургамлаар хийсэн цай, хавчны мах, шош, хар ногоон навчит хүнсний ногоо, хатсан чавга, өндөг, загас, далайн байцаа, булчингийн мах, наймаалж, тахианы мах, үзэм, гуаны үр, наранцэцгийн самар, улаан буудайн үр, эрдэнэ шиш зэрэгт төмөр агуулагдана.
Төмөр дутагдвал хумс хугарах, төмөр дутагдлын цус багадалт үүсэх, амьсгалахад хүндрэлтэй болох, арьс цайх, өтгөн хатах, хэл хорсох, сарын тэмдэг алдагдах зэрэг шинж илэрнэ.

МАГНИ. Алмонд /чавганы доторх чөмөгтэй төстэй/ самар, авокадо, мах, хэвэг, бразил самар, бор будаа, сагаг, эрдэнэ шиш, хатаасан чангаанз, хүнсний ногоо, зөгийн бал, далайн байцаа, загасны мах, шар буурцаг, бууцайн ногоон навч, шошны нахиа зэрэгт агуулагддаг.
Магни дутагдвал булчин өвдөх, татах, сэтгэл түгших, мартамхай болох, цусны даралт багасах, биеийн дулаан буурах, амархан уцаарлах, үс унах, нойр муудах, булчин татвалзах, шуугианд хэт мэдрэмтгий болох, судасны цохилт түргэсэх зэрэг шинж илэрдэг.

МАРГАНЦ. Алмонд самар, гадил, буурцаг, нэрс, цэцэгт ногоон байцаа, гурвалжин бор будаа, лууван, өндөгний шар, ногоон навчит бүх төрлийн хүнсний ногоо, элэг, самар, хатаасан үзэм, бүх төрлийн үр, талхны хөрөнгө, тариа зэрэгт агуулагддаг.
Марганц дутагдвал булчин сулрах, толгой эргэх, чих шуугих, цусан дахь холестрин, саахар ихсэх, таргалах, сонсгол муудах зэрэг шинж тэмдэг илэрдэг.

ФОСФОР. Шар айрагны хөрөнгө, сүүн бүтээгдэхүүн, өндөг, загас, тариа, элэг, сүү, самар, далайн ногоо, дүүпүү, эрдэнэ шиш, хэвэг зэрэгт ихээр агуулагдана.
Хэрэв фосфор дутагдвал хоолонд дургүй болох, яс өвдөх, янгинах, ядрамтгай болох, амьсгалын хэм алдагдах, мэдрэлийн өвчний шинж тэмдэг илрэх, жин хасагдах боломжтой.

КАЛИЙ. Чангаанз, авокадо, гадил цэцэгт ногоон байцаа, гуа-жимс, нанжин чавга, хатаасан жимс, загасны мах, яншуй, бөөрөнхий шош, тоор, төмс, үхэр, хонины мах, далайн ногоо, шар буурцаг, бууцай, улаан лоолийн жүүс, талхны хөрөнгө, шар өнгөт хүнсний ногоо, луувангийн шүүс, дүүпүү зэрэгт бий.
Калий хомсодсон тохиолдолд батга гарах, өтгөн хатах, ам цангах, цусны даралт багасах, арьс хуурайших, хавагнах, холестрин ихсэх, нойргүйдэх, булчин сулрах, сандрамтгай болж амьсгалын хэм алдагдах, арьсанд янз бүрийн жижиг ургацаг, нөсөө үүсэх, зүрхний цохилт удаашрах, рефлекс сулрах зэрэг шинж тэмдэг илэрдэг.

СЕЛЕН. Бразил самар, шар айрагны хөрөнгө, байцаа, өндөг, загас, сармис, хавчны мах, дунгийн мах, далайн ногоо, улаан лооль, талхны хөрөнгө, тариа зэрэгт байдаг.
Хэрэв цус багадах, тамирдах, ядрах, нойр булчирхайн үйл ажиллагаа алдагдах, үс унах, арьсны суурь өнгө өөрчлөгдөх, наснаас эрт өтлөх, халдварт өртөмтгий болох зэрэг шинж илэрвэл селен дутагдсаных юм.

СОДИУМ. Хүнсний соод нь бяслаг, өндөг, мах, сүү, боловсруулж нөөшилсөн бүтээгдэхүүн, кола, пепси зэрэг ундаа, давсалсан загас, хүнсний соод орсон нарийн боов, далайгаас авч ашигладаг хүнсний ногоонд агуулагддаг. Содиум дутагдвал хоолны дуршил муудах, шөрмөс татах, халдварт өртөмтгий болох, нүдний хараа муудах, амархан ядрах, гэдэс дүүрэн бөөлжим цутгах, хөдөлгөөний хүч буурах булчин жижгэрч хатингарших зэрэг шинж илэрдэг.

ЗИНК. Хавчны мах, үхрийн элэг, шар айрагны хөрөнгө, өндөгний шар, мөөг, бүх төрлийн самар, сонгино, вандуй, далайн ногоо, жимс, жимсгэний үр, тахианы мах, шар буурцаг, наранцэцгийн үр, талхны хөрөнгө, тарианы гурилд зинк их хэмжээгээр агуулагдана.
Харин дутагдсан үед батга гарах, хумс хугарах, мартамтгай болох, бэлгийн сулрал илрэх, арьсанд экзем гарч үнэрлэх амтлах чадвар суларна. Хоолонд дургүй болж, цусны эргэлт, ой ухаан муудах, ил үүссэн шарх удаан эдгэх, арьсны дээгүүр жижиг ургац ургацаг гарах, үсний үзүүр салаалах, хумсанд цагаан толбо үүсэх шинж тэмдэг илэрдэг.