Улсын хилээр шулуун гэдсэндээ алт нуун гарахаар оролдсон БНСУ-ын харъяат 13 иргэн нутаг буцахаар онгоцны тийзээ захиалжээ. Хэрэг нь эцэслэн шийдэгдээгүй байхад нутаг буцах болсон шалтгаан нь одоогоор тодорхойгүй байна. Хэргийг хянаж байгаа прокурорын зүгээс сэжигтнүүдийг нутаг буцах зөвшөөрөл олгоогүй гэж хэлж байгаа ч албан ёсоор тайлбар өгөхөөс татгалзаж байна.

Тэд өнөөдрийн “Кореан эйр”-ийн онгоцоор нисэхээр билетээ захиалсан. Одоогоор 13 солонгос иргэний тав нь буюу Ким Сэ Хонь, И Жон Тэ, Ким Сан Чоль, Чой Ким юунь, Ким Жүн Ёонь гэсэн хүмүүсийн бүртгэл тус компанийн билет бүртгэлд орсон байна. 

Манай улсын хуулиар гэмт хэрэгт  сэжиглэгдэж байгаа гадаадын иргэд хилийн дээс алхах үндэслэл байхгүй. Гэхдээ нэг гарц бий. Энэ нь хэргийг мөрдөж байгаа болон хянаж байгаа эрх бүхий байгууллага зөвшөөрсөн тохиолдолд боломж байдаг юм байна. 

Сэжигтнүүдийн бичиг баримт хуулийн дагуу “Гадаадын иргэн харъяатын асуудал эрхлэх газар”-т хураан хадгалдаг. Өнгөрсөн баасан гаригийн 17 цагийн орчимд БНСУ-ын харъяат 13 иргэний бичиг баримт байх ёстой газраа байсан. Бид баримтжуулах үүднээс дүрс бичлэгийг нь авч амжсан юм. 

Шулуун гэдсэндээ тус бүр нэг килограмм алт нууж гаргахыг завдсан тэдгээр 13 иргэний хэргийг нийслэлийн хяналтын прокурор Н.Сүхчулуун хянаж байгаа. Тэрээр сэжигтнүүдэд бичиг баримтыг нь олгож нутаг буцаах талаар нэг ч албан бичиг хүргүүлээгүй гэж байлаа. 

Тэгэхээр “Кореан эйр”-ийн онгоцонд билетээ захиалчихсан байгаа эдгээр сэжигтнүүд ямар бичиг баримтаар нутаг буцах гэж байгаа нь одоогоор тодорхойгүй. 13 солонгосыг авч нисэх онгоц цагийн хуваарийн дагуу өнөөдөр 23 цаг 50 минутанд Чингис хаан олон улсын нисэх онгоцны буудлаас Сөүлийн чиглэлд хөөрнө.