Арьсыг чөлөөтэй амьсгалах, эд эсээр нөхөгдөн сэргэхэд саад учруулж буй элдэв давхаргаас хамгаалан орой бүр арьсаа сайтар цэвэрлэх нь арьсыг үхэж, өнгөө алдахаас сэргийлдэг.

Сүүн шингэн
Сүүн шингэнийг бүхэл өдрийн турш цугларсан тоос шороогоо цэвэрлэх, будгаа арилгах зорилгоор хэрэглэдэг. Сүүн шингэнийг нүүр хүзүүгээрээ иллэгний шугамын дагуу түрхэж 20 минут байлгасны дараа бүлээн усаар угаана. Нүүрээ их усаар угаах тусам цэвэрлэгээ сайн хийгддэг.

Тосон цэвэрлэгч
Тосон цэвэрлэгчийн найрлагад тэжээлийн тос, витамин орсон учраас хуурайшиж холцруутсан суларсан арьс цэвэрлэх, уруулийн будгийг арилгахад хэрэглэдэг. Тос нь бохирдлыг өөртөө уусгаж гүн цэвэрлэхийн зэрэгцээ арьсанд дутагдаж буй тэжээлийг нөхөж өгдөг давуу талтай. Тосыг хөвөнд шингээгээд арьсаа татаж чирэхгүй, зөөлөн арчаарай. Дараа нь заавал бүлээн усаар угаана. Ийм цэвэрлэгчийг тослог болон холимог арьсанд хэрэглэвэл батга нэмэгдэж, ихэсдэг болохоор арьсныхаа төрлийг мэдэж хэрэглэх бүтээгдэхүүнээ зөв сонгох нь чухал.

Цэвэрлэгч хөөс
Иймэрхүү цэвэрлэгчийг тослог болон холимог арьстай хүмүүс тос дааварлаад байдаг хэсэгтээ түрхэж хэрэглэнэ. Хөөсөн цэвэрлэгч нь илүүдэл тос, хир буртаг арилгах үйлчилгээ бүхий 10 гаруй нэр төрлийн бодис агуулдгаараа онцлог юм.

Цэвэрлэгч салфетка
Цэвэрлэгч салфеткийг хөвсгөр зөөлөн хөвөн эд, целлюлозоор хийж арьсыг цэвэрлэх болон арьсанд тэжээл өгөх бодис нэгэн зэрэг шингэсэн байдаг учраас арьсыг цэвэрлэхдээ зөөлрүүлэх зорилготой хийгддэг. Гэхдээ салфетка болгон адилгүй. Арьс болгон тохирсон үзүүлэлттэй байдгийг анхаарах хэрэгтэй. Өөрөөр хэлбэл тослог арьсны цаасан цэвэрлэгчээр хуурай арьсаа арчвал нүүр улам хуурайшаад харлаж сэвхтдэг.