12 настай охиныг хичээлдээ явж байхад нь хулгайлаад Эрдэнэт хот руу авч явсан хүн худалдаалах томоохон бүлэглэлийн гишүүд байж болзошгүй гэмт этгээдүүдийг цагдаагийн албан хаагчид энэ сарын 16-ны 18.00 цагийн орчимд баривчиллаа. Тэд Сонгинохайрхан дүүргийн нутаг дэвсгэр болох "Драгон" авто вокзалын хажуугаар 07:00 цагт хичээлдээ явж байсан 12 настай М гэх охиныг "Сургууль дээр нь хүргээд өгье. Миний дүү машинд суучих, аав чинь бид хоёроос хүргээд өгчих гэж гуйсан юм" хэмээн хуурч, суулгаад Эрдэнэт хот руу аваад явчихжээ. Энэ талаар охины аав Н.Пүрэвдоржтой ярилцлаа.

-Танай охиныг хүн худалдаалах гэмт хэрэгтнүүд хулгайлаад авч явж байхад нь цагдаа нар баривчилсан гэж сонслоо?

-Би харуулын ажил хийдэг юм. 24 цаг гараад 48 цаг амардаг. Манайх хүү, охинтой. Ээж нь БНСУ-д ажил хийж байгаа юм. Охин маань алга болдог өглөө ажлаасаа буугаад гэртээ харьж, хүүгээ сургуульд нь 11 цагийн орчимд хүргэж өгөөд гарч явтал охины ангийн багш нь тааралдаад "Охин чинь өнөөдөр хичээлдээ ирээгүй. Бие нь өвдсөн юм уу" гэж асуусан. Өглөө эрт 06 цаг өнгөрөөгөөд гар утас руу нь залгаад ярихад хичээл рүүгээ гарах гэж байна гэж байсан хүүхэд алга болчихоор нь гайхаад гэртээ харьсан юм байх гэж бодоод очсон чинь гэрт байдаггүй. Бүх хамаатан садан, ах дүү рүүгээ утасдаад ирээгүй гэх хариу сонссон. Тэгээд бөөнөөрөө хайсан юм. РС тоглоомын газрыг сонирхоод орчихсон юм болов уу гэж хэд хэдэн газраар орсон боловч огт сураг гардаггүй. Тэгсэн нэг танил маань өглөө хоёр хүнтэй хамт Драгон дээр явж байсан гэж ярьсан. Энэ тухайгаа цагдаад мэдэгдэж өдөржин хайсан. Тэгээд л орой 18:00 цагийн үед Эрдэнэтийн наана хоёр хүнтэй охин чинь явж байхыг оллоо гэж цагдаагийн газраас мэдэгдсэн.           ,

-Та нарыг очиход охин чинь ямар байдалтай байсан бэ?

-Их айж балмагдсан байсан.

Цочролд ороод бараг юм ярьж чадахгүй хоёр хоносон, Одоо биеийн байдал нь сайжирч байгаа. Эрдэнэт хотоос 20 гаруй километрийн наана байдаг гэр цайны газрын тэндээс баригдсан байна лээ. Тухайн үед айлд очихоор Эрдэнэт хотын эргүүлийн цагдаа болох ахлах ахлагч Ганхуяг, дэслэгч Энх-Амгалан нар зам дээр явж таарсан байна лээ. Өмнөөс нь ирж байсан Соната II маркийн авто машин эсрэг урсгалаас ирж явахдаа сонин яваад байхаар нь зогсоосон гэсэн. Машинаас жолооч, эрэгтэй, эмэгтэй гурван хүн шал согтуу бууж ирээд "Энүүхэнд нэг шил архи уучихсан юм. Одоо ингээд хариад унтлаа" гээд цагдаа нараас гуйгаад зогсож байхад охин маань авраарай гэж хашгирсан байгаа юм. Тэгээд л охиноос бүх зүйлийг цагдаа нар мэдээд биднийг очтол саатуулаад байж байсан.

-Охиныг хулгайлсан хүмүүстэй уулзсан уу?

-Уулзсан. Хоёр гөлийсөн новш харагдсан. Тэднийг хүн худалдаалдаг гэмт бүлэглэлийн гишүүд байж магадгүй гэж сонссон. Надад танай охин чинь өөрөө л бидэнтэй хамт явмаар байна. Манай гэр Эрдэнэтэд байдаг гээд гуйгаад байсан" хэмээн ямар ч айсан шинжгүй хэлж байна лээ гэв.

-Хүн худалдаалдаг гэмт хэргийн томоохон бүлэглэлийнхэн баригдсан байж магадгүй

Энэ талаар албаны эх сурвалжаас тодруулахад "Охиныг хулгайлсан гэх сэжигтнүүдээс хоёр удаа мөрдөн байцаалт авсан. Одоогоор хамт явсан хоёр охин нь замын унаанд дайгдаж, Эрдэнэт хот орох гэж явсан хэмээн мэдүүлээд байгаа. Харин жолооч нь "Би энэ хүмүүсийг танихгүй. Энэ охиныг дагуулж "Драгон" дээр ирээд "Эрдэнэт явах гэж байгаа юм гээд л суусан". Харин охины хувьд замдаа уйлаад л би аав дээрээ очмоор байна гэж байсан" гэж мэдүүлээд байна. Харин яг охиныг хуурч машинд суулгасан гээд байгаа эрэгтэй, эмэгтэй хоёр нэрээ хэлэхгүй, Бид охиныг хулгайлаагүй. Харин өөрөө л гуйгаад хамт Эрдэнэт хот руу явмаар байна гээд гуйгаад байсан гэж мэдүүлээд байгаа. Хэрэг Сонгинохайрхан дүүрэгт үйлдэгдсэн болохоор тийшээ шилжинэ" гэлээ. Өөр нэг эх сурвалжийн хэлж буйгаар "Хохирогч охины сургууль гэрээс нь хол болохоор өглөө эрт сургууль руугаа явдаг юм билээ. Мөн ар гэрийн амьдралыг нь судалж үзээд охиныг хулгайлсан байж магадгүй. Эрдэнэт хотод тэднийг өөр хүмүүс хүлээж байсан байх" гэв.