Саяхан Солонгос дахь цагаач эмэгтэйчүүдийн эрхийг хамгаалах байгууллагаас өөрийн вэбээрээ дамжуулан сонирхолтой судалгааны тоо баримтуудыг дурджээ. Эдийн засаг, нийгмийн дэвшлээрээ үсрэнгүй хөгжиж яваа Солонгос улсын эрчүүд нь гаднын бэр авах явдал элбэг байдаг аж. Үүнд Ази, зүүн өмнөт Азийн улсуудын хүүхнүүд гололдог ба мөн Монгол бүсгүйчүүд маань Солонгос хүнтэй суун одсоор байгаа талаар бид ярилцсаар буй. Тус төвийн захирал бүсгүй Кангийн өгүүлж буйгаар Солонгосд гаднаас ирж буй бүсгүйчүүдийн ихэнх нь эдийн засгийн шалтгаанаар ирдэг ба Солонгос эртэй суусан хойноо хэл соёл, амьдарал ахуйн урьдчилан төсөөлсөн, төсөөлөөгүй янз бүрийн асуудалд орж тус төвд хандах нь элбэг байдаг гэнэ. Цагаач бүсгүйчүүдийн 37% бусдын болон төлбөрт зуучлалаар, 34.3% нь ойт дотнын найз нөхөдийн дэмжлэг зуучлалаар, 10% өөрсдөө, 7% нь шашны байгууллагын шугамаар Солонгос нөхөртэйгөө танилцан ирсэн байдаг аж.
Бэр болон ирсэн бүсгүйчүүдийн нас нь залуу байх тусмаа Солонгос нөхөрөөрөө зардал бүх юмаа даалган ирсэн байх нь илүүтэй байдаг гэнэ. Гэхдээ хамгийн харамсалтай нь ихэнх бүсгүйчийн хувьд танилцхад зуучилсан байгууллагууддаа хууртагдан сайн сайхан амьдралыг төсөөлөн ирэхэд огт өөр орчин угтддаг байна.
Царайлаг залуу хүний зураг үзүүлэн, амжилттай бизнесмэн, чинээлэг ганц бие эр хүн хэмээн магтаад байсан хүн нь нас нэлээн хэвийсэн, ажил төрөлгүй, ядуу, зарим нь бүр өвчин эмгэгтэй байх нь ховор биш гэнэ. Солонгос бэр болж ирсэн бүсгүйчүүдийн 47% хадмуудтайгаа хамт амьдардаг ба энэ нь нөхөр нь ядуу тусдаа гарах чадваргүйгээс болдог гэнэ. Хөдөө газар тариалан фарм дээр амьдрах нь их байдаг ба тийм тохиолдолд хадмуудтайгаа нэг гэрт амьдрах нь илүүтэй байдаг. Хадмуудтайгаа хамт амьдрах нь үнэхээр хэцүү маш их дарамтанд байдаг хэмээн бүсгүйчүүд ярьжээ.
Цагаач бүсгүйчүүд Солонгос нөхөртэйгээ амьдралын хэв заншил өөр учираас хэрүүл хийх нь их байдаг ба Монгол болон Филипин бэрүүд энэ тал дээр дээгүүр буюу ойролцоогоор 30% байсан байна.
Гэр бүл дотороо хэр зодоон цохион хийдэг вэ гэсэн санал асуулгад оролцсон бүсгүйчүүдийн 54% хариу хэлээгүй байна. Нөхөр нь насаар ахимаг байх тусмаа авгайдаа гар хүрэх нь илүүтэй байдаг гэнэ.
Сонирхолтой нь гаднын бэрүүдийн 60% гаруй хувь нь нөхөрөөсөө салах хүсэлгүй гэсэн бөгөөд 16% салах өргөдлөө өгсөн, салахаас өөр аргагүй гэж хариулсан ба нөхөрөөсөө салах хүсэлтэй бүсгүйчүүдийн ихэнх нь Монгол Тайланд бүсгүйчүүд байсан гэнэ. Ха манай Монгол бүсгүйчүүд шийдэмгий зоригтой нь эндээс харагдаж байна. Монголд тийм сайхан эрх чөлөөтэй, эр нөхөрөөсөө илүү гэхэд дутуугүй эрх мэдэлтэй, зарим нь бүр эр нөхөр, найз залуу энэ тэрээ чанга барьж байдаг улсууд яаж тийм дарамттай орчныг тэвчих вэ дээ.
Судалгааны төвийн үзэж буйгаар 2015-2020 он гэхэд Солонгосын хөдөө орон нутагт гаднын бэртэй гэр бүлүүд нийт гэр бүлийн 50% орчим хувийг эзлэх ба хэл, соёл, заншил, амьдрал ахуйн ялгаанаас үүдэлтэй асуудлууд байсаар байх л болно гэжээ.
http://migrantsinkorea.net/?document_srl=64202