"Ханзарсан хэтэвчээ яаж оёх" вэ гэсэн асуултын хариуг олох гэж эдийн засагчдыг мунгинаж суух хооронд энэ долоо хоногт валютын зах зээл дээр ямар үйл явдал болсон талаар хүргэе.
Өнгөрсөн даваа гаригт ам.долларын төгрөгтэй харьцах ханшийг Монголбанкнаас 1372 төгрөг зарласан. Харин энэ өдөр "Голомт" банк нэг ам.долларыг 1405 төгрөгөөр авч 1435 төгрөгөөр зарж байлаа. Мөн "Худалдаа хөгжлийн банк" энэ өдөр "ноён" долларыг 1386 төгрөгөөр авч 1440 төгрөгөөр арилжаалж байв. Дээрх гурван банкны зарласан ханш өнгөрсөн пүрэв гаригаас эхлэн савлаж эхлэв. Тодруулбал, "Голомт" банк энэ өдөр нэг ам.долларыг 1415 төгрөгөөр авч 1460 төгрөгөөр зарж байв. Үүнийг өнгөрсөн даваа гаригийн ханштай харьцуулахад авах нь арав, зарах ханш нь 25 төгрөгөөр нэмэгдсэн байна.
Харин "Худалдаа хөгжлийн банк" өнгөрсөн пүрэв гаригт "ноён" долларыг 1386 төгрөгөөр авч 1460 төгрөгөөр зарж байсан нь гурван өдрийн өмнөхтэй харьцуулахад зарах ханш нь 20 төгрөгөөр нэмэгдсэн байв.
Өнгөрсөн мягмар гаригт БНХАУ-ын юанийг "Голомт" банк 206 төгрөгөөр авч 215 төгрөгөөр зарж байлаа. Харин өчигдөр авах ханшид ямар нэгэн өөрчлөлт ороогүй ч зарах ханш таван төгрөгөөр нэмэгдсэн байв.
"Найман шарга" валют арилжааны төв өчигдрийн 12.20 цагийн үед нэг ам.долларыг 1460 төгрөгөөр авч 1468 төгрөгөөр зарж байлаа. Энэ ханшийг банкуудын зарласан ханштай харьцуулахад авах нь 74, зарах нь найман төгрөгийн зөрүүтэй байлаа. Харин юанийг тус валют арилжааны төвийн ченжүүд 214.50 төгрөгөөр авч 215.80 төгрөгөөр зарж байлаа.