Орой ажлаасаа тарж хотын угаараар амьсгалах бүрийд Монголд буцаж ирсэн шийдвэрээ зөв байсан эсэхэд улам бүр эргэлзэх боллоо. Бидний бахархан ярих дуртай хөх тэнгэр, уудам нутаг, хаа байна??? Түй ч алга. Монголд одоо там болсон хэдэн зам, угаартаж үхмээр хар утаа, ууртай хүмүүсээр дүүрсэн, дампуу улс төрчидтэй урагшаа биш хойшоо явж байгаа нийгэм л байх шив дэ.

Энд залуу хүн юунд найдаж, юу хүсэж амьдрах юм бэ? Сургуулиа төгсөөд нэг ажил олж хийсэн болно. Цалин гэж өдрийн хоол, хужаагаас голдуу ирсэн хэдэн хувцас аваад цөөн цаас үлдэх бол идэж уугаад дуусаа. Дэлгүүр хэсч юм авна гэдэг хөгжилтэй оронд өөрийгөө баясгах хэлбэр байдаг бол энд бараг уйтгар гуниг. Өнөө хэдэн цаасаа өөрөөсөө харамлан харамлан байж ганц гутал авна, гэтэл маргааш нь автобусанд алалцаж байгаад оёдлоороо зад ш**на. Тэгээд концерт дуусаа.

Ээж аав нь бололцоотой бол тал мөнгийг нь гаргаад үлдэх хэсгийг нь банкнаас зээл аваад байртай болж болох хэдий ч 8-10 жилийн турш цалингаа бүгдийг нь зээлд өгөөд дуусна. Хүнд байр сууцнаас гадна өөр олон хэрэгцээ байдаг, тэр тусмаа залуу хүнд. Эсвэл чи түмний нэг бол хахууль авч, луйвар хийгээд шоронд орчихгүй бол яахав нэг муу юм амьдарсан болно.

Миний нэг таньдаг хүүхэн гэр хороололд очиж хонож л дэ. Тэгсэн нөгөө залуу нь шөнөжингөө босч гал түлсэн гэж байгаа юм. Бас тансаглаад дан нүүрс түлсэн гэж байгаа юм. Ёоо, онигоо гэхэд хаашаа юм, гэхдээ амьдрал өнөөдөр ийм л байна штэ.

Эд хөрөнгөө алдсан бол багыг алдсанд тооц, эрүүл мэндээ алдсан бол бүхнийг алдсанд тооц гэдэг үг байдаг. Өнөөдрийх шиг утаатай нэг өвлийг ардаа хийж болно, 2 өвлийг бас тэслээ гэж бодъё, харин 3 дахь өвлөө эрүүл саруул давж чадах уу? Жил бүр хэдэн мянган хүн цаазаар авдаг Хятад улсад хүний эрхтэн хамгийн хямд гэдэг. Уушиг гэхэд л 150,000 доллар. Яс юман дээр 10 доллар ч их мөнгө. Тэгээд та уушиг худалдан авч чадах уу? Эсвэл үхэх үү?

Үүнээс гадна Монголын нийгмээс ирж байгаа нүдэнд харагдахгүй угаарыг тоочоод байвал барагдахгүй. Одоо гадуур баахан хямдрал зарлаад байгаа. Тэр чинь бүгдээрээ луйвар. Манай найз хямдралаар гутал худалдаж аваад хэд хоногийн дараа очтол хямдралаар зарсан үнээсээ хямд зарж байсан гэсэн. Хямдрал нэрийн дор үнээ өсгөж луйвар хийж байсан байгаа юм.

Бид Америкт шал угаадаг хүний сарын цалингийн тал /800,000/-г авдаг байтлаа тэндэхийн бараанаас хамаагүй муу зүйлийг хэд нугалсан үнээр авдаг. Худлаа гэвэл томоохон дэлгүүрийн веб сайтаар ороод үз. Хэчнээн чанартай бараа, хүнсний зүйл хэчнээн бололцооны үнэтэй байна? Харин Монголд яаж үхтлээ шулуулж байгаагаа нэг ч гэсэн удаа бодоод үз.

Одоо байгаа Төр засгаа хар. Улсын хэмжээний ганц төрөх газар нь өнгөр, хөгзөнд идэгдээд дуусч байхад ямаанд 30 тэрбумыг өгч л байдаг. Харсаад байтал мөнгө тарааж байгаад сонгогдсон төрийн түшээ байхад Цагдаа, Авилгалтай тэмцэх нэртэй сүржин байгууллага нь өөрсдийнхөө сайн ажилласныг гайхаад сууж байдаг.

Үгүй ээ, амьдрал гэж ийм байдаггүй юм. Хүн өглөө босоод гадагшаа гарахдаа угаартаж үхэхээс айхгүй байх хэрэгтэй, цалингаа аваад инээд алддаг болохоос яаж хүргэх вэ гэж гунигладаггүй байх ёстой, нэр төртэй шударга амьдрах боломжтой байх хэрэгтэй, мөрөөдөлтэй, тэр нь биелэгддэг нийгэмд амьдрах хэрэгтэй.

Би Монгол хүн, Монголдоо хайртай. Ингэлээ гээд дуугай байж байгаад хордож үх гэсэн үг биш. Энэ их утаа ойрын 4 жилдээ лав ихсэнэ үү гэхээс багасахгүй. Өнгөрсөн жил тасалгаан дотор үнэртдэггүй байсан утаа одоо үнэртэж байна. Дараа жил маск зүүгээд ч нэвтрэнэ. Ямар ч байсан энэ дампуу газраас зайлахдаа нэг зайлна. Чухам хэзээ вэ гэдэг л байна.

Бололцоогоо ашиглаад гадагшаа гар. Хүмүүс яаж ажиллаж, яаж амьдардгийг хар. Хамаа алга, очоод ачигч хий, шал угаасан ч яадаг юм. Хөдөлмөрийн үнэ цэнийг ойлго. Өглөө ажилдаа ирсэн болж хов жив уншиж байгаад орой 6-тай уралдаад харьдаг, тэрийгээ ажил хийсэн гэж ярьдаг бол өөрөөсөө ичээрэй. 25-30 насны тэгээд татлаа түлхээ багатай бол эртхэн аяа бодсон нь дээр. Харин 2-3-н хүүхэд цувуулчихаад гадагшаа гарч шинэ амьдрал зохионо, мөнгө төгрөг олж амьдарлаа өөд нь татна гэдэг юм уу, сурч боловсроод сүйд болгоно гэж ярьж байгаа бол уучлаарай тийм юм ерөөсөө байхгүй гэдгийг бас хэлье.

Гадагшаа гарах гэж байгаа бол ядаж нэг сургууль төгсөх хэрэгтэй. Хар багаасаа мөнгөний мөр хөөсөн хүүхдүүд дэндүү харалган болдог. Яаж мөнгө олох вэ гэж бодохоос яаж хүн шиг амьдрах вэ гэж боддоггүй, атгын чинээ тархиныхаа хэмжээнд сэтгэдэг гэх үү дэ. Харин хөгшин баагий нар очоод авгайгаа хаяад, хүүхдээ өнчрүүлээд лалартаад эхэлдэг. Анх явахдаа болно бүтнэ, болгоно бүтээнэ гэдэг биз, гэхдээ хэдэн цаас олоод юм үзэж нүд тайлаад ирэхээрээ юун наадам юун цагаан сар... Харин бага ч гэсэн номын дуу сонссон, худлаа ч гэсэн ажил хийж үзсэн хүний хувьд арай дээр. Тэд мөнгө хөөж хэсэг яваад, өөрийгөө хальтхан үнэлээд бичиг үсэг мэдэхгүй шахам Мексик голдуу цагаачдаас зайгаа барьж хүн шиг амьдрахыг боддог. Ингээд бичээд байвал үлгэрийн далай болох нь...


----Яг тиймээ блогоос----