БНАСАУ-ын армийн байлдах чадвар ноцтой аюул занал учруулахгүй гэж АНУ үзэж байна. Тус оронд олон жилийн турш нийтийг хамарсан өлсгөлөн үргэлжилж байгаа учир армийнх нь байлдах чадвар доройтсон байна. Энэ тухай Пентагоны тэргүүн Роберт Гейтс Нью-Йорк мужийн “Fort Drum”-ын цэргийн баазын бие бүрэлдэхүүнтэй уулзах үеэр хэлснийг “РИА Новости” мэдээлсэн байна. Тэрбээр “БНАСАУ-д 1990-ээд оны дунд үеэс эхэлсэн хүнсний хомсдол, өлсгөлөн тус улсын зэвсэгт хүчинд алба хааж буй цэргийн албан хаагчдын оюуны болон бие бялдрын байдалд сөргөөр нөлөөлж байна.
Ийм учраас Хойд Солонгосын арми өлсгөлөнд автагдсан. Тус улсад энэ хугацаанд 22 сая хүн амаас сая орчим нь өлсгөлөнгийн улмаас амь үрэгдсэн. Гэхдээ Хойд Солонгосын эрх баригчид цөмийн зэвсэг, алсын тусгалтай пуужин туршиж байгаа. Бид тэдний үйл ажиллагаанд хатуу хяналт тавьж байна. Тэд мунхаг алдаа гарахгүй гэдэгт итгэж байна” гэж хэлжээ. Дашрамд дурьдахад, Хойд Солонгосыг ардчилах Өмнөд Солонгосын хорооны удирдагчдын нэг Кан Чон Хван Японы “Санкей” сонинд өгсөн ярилцлагадаа “БНАСАУ-ын эрх баригчид иргэд нь хятад руу бөөнөөрөө дүрвэж байгааг таслан зогсоохын тулд хоёр улсын хил дээр 300 мянга орчим цэргийн албан хаагчийг татан төвлөрүүлээд байна. Сүүлийн үед хилийн энэ хэсэгт буун дуу өдөр бүр тасрахгүй гарч байна.
Тэд хятад руу дүрвэн гарахыг оролдсон иргэдээ буудаж байгаа энэ. Хойд Солонгост хүнсний бүтээгдэхүүний хомсдол урьд өмнө байгаагүйгаар хурцадсан. Хүн амын хувьд эх орноосоо зугтан гарах уу эсвэл турж үхэх үү гэсэн сонголтын зааг дээр байна” гэж хэлсэн байна. Янз бүрийн эх сурвалжийн мэдээгээр 1995-1999 онд Хойд Солонгост өлсгөлөнгийн улмаас 200 мянгаас 3,5 сая хүн нас барсан гэнэ. НҮБ-ын мэргэжилтнүүдийн урьдчилан сануулж байгаагаар “Энэ онд тус улс хүнсний бүтээгдэхүүний ихээхэн хомсдолд орж, хүн амын 40 хувьд нь өлсгөлөнгийн аюул нүүрлэх болно. Хомсдол нь хөдөө аж ахуй салбар дахь үр тариа, шатахууны хүрэлцээ муу байгаатай холбоотой” ажээ.