В.Путин: Монголын ашигт малтмал бидний сонирхлыг татаж байна.
Уншсан 2618 vote 0 2009.05.14 18:41:15
ОХУ-ын Засгийн газрын тэргүүн В.Путин Ерөнхий сайд С.Баярын урилгаар манай улсад өчигдөр айлчиллаа. Тэрбээр манай улсад зургаан цагийн ажлын айлчлал хийсэн юм. Түүний хөлөглөсөн онгоц хуваарь ёсоор өчигдөр 14.30 цагт “Чингис хаан” олон улсын нисэх буудалд буух ёстой байсан боловч тодорхойгүй шалтгаанаар 20 минут хоцорч газардав. В.Путин Монголд хөл тавьмагцаа шууд л Төрийн ордныг зорьсон. Тэрбээр 15.30 минутад Төрийн ордны “В” танхимд Ерөнхий сайд С.Баяртай ганцаарчилсан уулзалт хийлээ. Хоёр орны Засгийн газрын тэргүүн нар хооромдбо оросоор ярилцсан бөгөөд уулзалтын эхэнд сэтгүүлчдийг түр байлцуулаад “хөөж” орхив. С.Баяр, В.Путин хоёрын “нууц” яриа 30 орчим минут үргэлжилсэн юм.
Дараа нь “Б” танхимд хоёр талын Засгийн газрын тэргүүн хэлэлцээр хийлзэ. Уг хэлэлцээрт эдийн засаг, хөдөө аж ахуйн салбар болон уул, уурхай тэр дундаа ураны чиглэлээр хамтран ажиллах талаар хоёр тал санал солилцов. Үүний дараа Төрийн ордны ёслол хүндэтгэлийн танхимд хоёр тал хамтын ажиллагааны баримт бичигт гарын үсэг зурсан юм
Хүнс, хөдөө, аж ахуй, хөнгөн үйлдвэрийн сайд Т.Бадамжунай, ОХУ-ын Хөдөө аж ахуйн сайд Е.Б.Скрынник нар хамтарсан мэдэгдэлд гарын үсэг зурав. Мөн Зам, тээвэр, барилга, хот байгуулалтын яам болон ОХУ-ын Тээврийн яам хоорондын харилцан ойлголцох санамж бичгийг ЗТБХБ-ын сайд Х.Баттулга, ОХУ-ын Тээврийн сайд Монголын Засгийн газар хоорондын комиссын Оросын хэсгийн ахлагч И.Е.Левитин нар үзэглэв.
Мөн хязгаарлагдмал хариуцлагатай компани байгуулах тухай “Монголын төмөр зам” төрийн өмчит хувьцаат компани, “Эрдэнэс МГЛ” хязгаарлагдмал хариуцлагатай компани болон “Оросын төмөр замууд” нээлттэй хувьцаат компани хоорондын хэлэлцээрт МТЗ-ын Төрийн өмчит ХК-ийн гүйцэтгэх захирал А.Батболд, “Эрдэнэс МГЛ” төрийн өмчит ХХК-ийн гүйцэтгэх захирал Б.Энэбиш, Оросын төмөр замын хамтын нээлттэй нийгэмлэгийн ерөнхийлөгч В.И.Якунин нар гарын үсэг зурлаа.
Түүнчлэн мэргэжилтэн бэлтгэх талаар Монгол Улсын Засгийн газрын тохируулагч агентлаг, Цөмийн энергийн газар, ОХУ-ын Атомын энергийн улсын “Росатом” корпораци хоорондын харилцан ойлголцлын санамж бичигт Цөмийн эрчим хүчний газрын дарга С.Энхбат, “Росатом” цөмийн эрчим хүчний улсын корпорацийн ерөнхий захирал С.В.Кириенко нар гарын үсэг зурав. “МИАТ” ХК болон “Аэрофлот” компани хоорондын код хамтран ашиглах хэлэлцээрт “МИАТ” ХК-ийн гүйцэтгэх захирал Р.Бат-Эрдэнэ, “Аэрофлот” хувийн нээлттэй нийгэм-лэгийн ерөнхий захирал В.Г.Савельев нар гарын үсэг зурсан юм.
Энэ үеэр ОХУ-ын Засгийн газрын тэргүүн В.Путин “Хоёр улсын хамтын ажиллагааны талаарх гэрээ хэлэлцээр амжилттай болж өнгөрлөө. Уг хэлэлцээр нь хоёр улсын уламжлалт найрсаг харилцааг бэхжүүлэх, цаашид хамтран ажиллах бололцоог улам бүр баталгаажуулж байна.
Цаашлаад хоёр улс техник, эдийн засаг, боловсрол, соёл, шинжлэх ухаан, уул уурхай, хөдөө аж ахуй, хөрөнгө оруулалтын салбарт хамтран ажиллахад бэлэн. Эхнээсээ хөдөө аж ахуйн чиглэлээр орж ирэх техник хэрэгсэл ороод ирлээ. Түүнчлэн Оросын талын сонирхлыг татаж байгаа хэд хэдэн зүйл байна. Тэр дундаа уул, уурхайн салбар. Монгол Улс нь ашигт малтмалаар баялаг орон юм. Эдгээр орд газруудыг эдийн засгийн эргэлтэд оруулах, дэд бүтцийг сайжруулахчиглэлээр хамтран ажиллахад бэлэн байгаа. Эдгээр асуудлууд бидний хэлэлцээрийн гол сэдэв боллоо” гэв.
Уул, уурхайн чиглэлийн том орд газрууд ашиглалтад орох гэж байгаа тул хоёр улсын хамтарсан төмөр зам байгуулах талаар санал солилцов.
Хоёр улсын Засгийн газрын тэргуүнээс хоёр улсын хамтарсан Төмөр зам? “Эрдэнэт” гэсэн хоёр том үйлдвэр байна. Эдгээр байгууллагуудын үйл ажиллагааг цаашид хэрхэн хөгжүүлэх талаар ямар бодолтои байна гэсэн асуултад хоёр тал. Өнгөрсөн хугацаанд хамтран ажиллаад амжилтад хүрсэн. Цаашид хамтран ажиллах чилгэлээ улам өргөжүүлэх бодолтой байгаагаа энэ үеэр илэрхийлэв.
Мөн В.Путин Ерөнхийлөгч Н.Энхбаярт бараалхаж хөдөө аж ахуйн салбарт зээлээр ирж буй техник хэрэгслийг холбогдох албаны хүмүүст гардуулсан юм. Тэрбээр цаашаа К.Жуковын хөшөөнд цэцэг өргөн, Үнэн алдартны сүмд зочлоод, 21.00 цагт нутгийн зүг хөлгийн жолоо залав.http://www.zaluu.com/
Ц.ПҮРЭВ
- Холбоотой бичлэг :
- http://www.mglclub.com/1690688/11f/trackback
