БНАСАУ-ын удирдагч Ким Чен Ир гурав дахь хүү Ким Чон Оныг өөрийн залгамжлагчаар тодруулжээ. Эндхийн хэвлэл учрыг мэдэх хүний хэлснийг иш татан ингэж мэдээлсэн байна.
Энд уг алхамыг залуу Кимийг нийгэмд одоогийн удирдагчийн залгамжлагч хэмээн хүлээн зөвшөөрч буйг бататгах гэсэн албан ёсны арга хэмжээ хэмээн дүгнээд, энэ нь 67 настай Ким Чен Ирийн бие муудаж байгаатай холбоотой байж болох юм гэж үзэж байна. Тийнхүү энэ нь БНАСАУ-ын түүхэнд засгийн эрхийг эцгээс хүүд шилжүүлэх хоёр дахь үйл явдал болох юм.
Учрыг мэдэх хүний хэлснээс үзвэл, цөмийн хоёр дахь туршилт хийсний дараа Солонгосын хөдөлмөрийн нам, Солонгосын ардын арми, Ардын дээд хурлын тэргүүлэгчид ийм мэдэгдлийг хүлээн авчээ. Үүнээс дөрвөн сарын өмнө Ким Чен Ир 25 настай Ким Чон Оныг өөрийн залгамжлагч гэж мэдэгдээд, энэ оны нэгдүгээр сарын 8-нд зохих удирдамжийг эрх баригч Хөдөлмөрийн намын удирдлагад явуулсан байна. Энэ мэдээллийг тараахгүй байх зааврыг гадаад дахь БНАСАУ-ын төлөөлөгчийн газруудад өгчээ.
Ким Чон Он Умард Солонгосын удирдагчийн гурав дахь гэргий Ко Ён Хигээс төрсөн хүүхэд юм. Тэр 2004 онд 51 настайдаа хөхний хорт хавдраар нас баржээ. Ким Чон Он Швейцарын Берн хотын Олон улсын сургуульд боловсрол олсон байна. БНАСАУ-д буцаж ирсний дараа түүний тухай тодорхой мэдээлэл бараг гараагүй юм.
Эцэг бөгөөд БНАСАУ-ыг үндэслэгч Ким Ир Сен 1974 оны хоёрдугаар сард Солонгосын хөдөлмөрийн намын их хурал дээр Ким Чен Ирийг залгамжлагчаараа зарлахад тэр 32 настай байсан билээ. Ким Чен Ир эцгийгээ нас барсны дараа 1994 оноос улс орныг удирдах болсон юм