Хүүхэд залуусын чөлөөт цагаа өнгөрөөдөг, уулзаж болздог байсан Соёл амралтын хүрээлэн хоёр жилийн өмнөөс үүдээ хааж, удирдлагууд нь их засварын ажил эхлүүлэх нэрийн дор оногдсон газраа зараад дуусчээ. Ингэж хэлж байгаа нь өнөөдөр тухайн газрын багахан хэсэгт хуучирч муудсан тоглоом байсан гэх ором үлдэж, ихэнх талбайд нь хувийн компаниуд зочид буудлын зориулалтаар барилга барьж байна. Тухайн үед хүрээлэнгийн удирдлага "Манайх газар, талбайгаа зараад, үрсэн зүйлгүй. Харин ч энэ талбайгаа хэнд ч хэзээ ч өгөхгүй шүү" гэх зүйл яриад зогсохгүй "Японы "Иточу" компанийн хөрөнгө оруулалтаар паркийн тоглоом авчраад Монголын Диснейленд болгоод өгнө" л гэж байлаа. Гэтэл өнөөдөр амлаад байсан Диснейленд бүү хэл тоглоом суурилуулах талбай ч үгүй үлдэх нь. Дээр дурьдсан зүйлүүд тухайн үед яригдаж байсан өнгөн хэсгийн асуудал.

Анх парк шинэчлэгдэх 2007 онд Л.Наранхүү захиралтай "Мон Уран" компани паркийн удирдлага байтугай газрын албанаас ч зөвшөөрөл аваагүй атлаа барилгын ажил эхлэхээр газрыг нь өмчлөн авч, хашаа хатгаж байхад "Иточу" компани газрын асуудал зохицуулагдтал хөрөнгө шилжүүлэхгүй гэсэн" хэмээн хүрээлэнгийн удирдлага гомдоллож байсан. Харин сүүлдээ Японы талаас хөрөнгийн 80 хувийг өгсөн учраас тоглоом шинэчлэлийн ажлыг эхлүүлэхээр болсон. Гэхдээ газрын маргааныг хэрхсэн талаар ямар ч тайлбар байгаагүй.

Одоо 2009 он. Хоёр жилийн дотор л сайхан тоглоомуудаар чимсэн гоёхон парк үүдээ нээгээд хүүхэд багачуудаа хүлээн авна гээд Улаанбаатар хотын Захирагчийн албанаас болзолт өдрийг зарлаж байсныг уншигч та санаж байгаа байх. Харамсалтай нь одоо хэр будаг нь ханхалсан тоглоомын сураг

байхгүй. Шарилжинд дарагдсан алга дарам газар л байна. Харин Соёл амралтын хүрээлэнгийн хоёр талд хувийн компанийнхан барилгын ажлаа эхлээд бүтээн байгуулалт ид өрнөж байна лээ.

Энэ бол өнөөдөр болж буй үйл явдал. Хамтйн гол нь өнөөх "Иточу" компанийн хөрөнгө оруулалтаар ирсэн Японы тоглоом суурилуулна гэсэн нь үлгэр болж БНХАУ-ын "Shi Вао Lai" компанид үйлдвэрлэсэн 12 тоглоомыг суурилуулах ажил явагдаж, зураг төслийг нь Монголын нэг компанид хийлгэн, гүйцэтгэлийг нь "Бодь интернэшнл" компани хийж байна. Гэхдээ хоёр жилийн өмнө яригдаж байсан олон тооны тоглоом бус ердөө л 12 тоглоом ирсэн. Учир нь "Газар талбайг нь хувийн компаниуд хувааж авсан учраас олон тооны тоглоом байрлуулах зайгүй болсон" гэдгийг холбогдох хүмүүс нь ч хэлж байгаа.

Ямар учраас Япон тоглоом бус Хятад тоглоом авчирсан, "Иточу" компаниас өгсөн их хэмжээний хөрөнгө хаачсан талаар Соёл амралтын хүрээлэнгийн удирдлагаас тодруулах гэсэн боловч "Тоглоомтой холбоотой бүх асуудлыг "Бодь интернэшнл"-ийнхэн мэдэж байгаа. Одоо хүрээлэнгийнхэнд хамаагүй гэдэг тайлбар өгөв. Тиймээс "Бодь интернэшнл компанийн дэд захирал Н.Батнягтаас тодрууллаа.

-Японы хөрөнгө оруулалтаар тоглоом суурилуулна гэж байсан. Гэтэл Хятадаас 12 тоглоом оруулж ирсэн байна. Энэ ямар учиртай юм бэ?
-Японы хөрөнгө оруулалт гэдгийг зөвөөр ойлгох хэрэгтэй. "Иточу" компани тоглоом шинэчлэлд зөвхөн хөрөнгө оруулна л гэж байсан. Харин хаанаас ямар тоглоом авахаа манай тал мэднэ. Тиймээс бид ажлыг гүйцэлдүүлж байгаа.

-Гэхдээ анх засвар эхлэх үед Японы тоглоом авчирна гэж байсан. Одоогоор хичнээн төгрөгийн санхүүжилт ирчихээд байгаа вэ?
-Өнөөдрийн байдлаар 6.5 тэрбум төгрөг зарцуулсан. Засварын ажил бүрэн дуусахад 13-14 тэрбум төгрөг зарцуулагдана. Хэдийгээр паркийн тоглоомыг Европын орнууд сайн хийдэг ч Хятадын компанид чанартай үйлдвэрлэдэг болсноос гадна үнэ өртөг нь ч хямд байдаг. Тиймээс "Shi Вао Lai" компаниас тоглоом авч байгаа.

-Хүрээлэнгийн газрыг хувийн компаниуд авсан учраас тооцоонд орсон тоглоомыг багтаах газаргүй болж, ердөө л 12 тоглоом авчирсан гэж дуулсан?
-Газартаа баригдаад цөөн тоглоом авчирсан юм байхгүй. Анх засвар эхлэх үед Соёл амралтын хүрээлэнгийн газрыг "MCS" компани албан ёсоор авсан байсан. Харин "Мон Уран" компани одоо хэр нь ямар ч газрын зөвшөөрөлгүй атлаа хүрээлэнгийн мэдлийн газар дээр барилга барьж байгаа. Үүнийг холбогдох хүмүүст нь удаа дараа мэдэгдсэн. Тоглоомын тухайд эхний ээлжийн тоглоомуудыг угсарч дууссаны дараа дараагийн тоглоомуудыг авчирна. Бидний тооцоолсноор Соёл амралтын хүрээлэн 40 гаруй тоглоомтой болно.