АН-ын Үндэсний зөвлөлдөх хорооны хурал ирэх сарын эхээр хуралдах талаар бид мэдээлсэн.
Тэд энэхүү хурлаараа Ерөнхийлөгчид нэр дэвших хүнээ тодруулах ёстой. 830 төлөөлөгч цуглаж сайн, муугаа ярилцах тус хурлаар Ерөнхийлөгчид нэр дэвшигчийг тодруулах тул нэлээн ач холбогдол өгч байгаа.
Өдгөө тус намд албан ёсоор нэр дэвшихээ мэдэгдсэн ганцхан хүн байгаа ч нэр дэвших сонирхолтой хүмүүс нь аль хэдийн хувийн тоглолтоо хийгээд эхэлчихсэн. Гэтэл сүүлийн үед АН-ынхан Их хурлаараа намын даргын асуудлыг хөндөх гэж байгаа гэх бор шувуу нисэж эхлэв.
Хурал хийх болгондоо л намын даргаа огцруулна гэдэг тус намынханы “өвчин” нь сэдэрсэн бололтой. Хэрэв АН-ынхан Ерөнхийлөгчийн сонгууль хаяанд ирчихсэн энэ эгзэгтэй үед дээрх асуудлыг сөхөх юм бол юун нөгөө Ардчилсан Ерөнхийлөгчтэй болохтой манатай. Ядаж байхад олон фракцтайг ч хэлэх үү. Тиймээс Их хурлаараа намын даргын асуудлыг ярьж эхэлбэл нөгөө фракцууд нь улам хагаралдаж Ардчилсан нам байнд ч үгүй банзанд ч үгүй хоцрох нь лавтай.
Учир мэдэх хүмүүс төдийгүй МАХН-ынхан ч “АН-хан арай ингэж “тэнэгтэхгүй” биз дээ. Хэрэв тэгвэл бидэнд л сайн юм болно” хэмээн бөөн баяр байгаа сурагтай.