Хичээл заадаггүй, тэгээд 12-хон оюутантай дээд сургууль байвал яахав !
Уншсан 4268 vote 0 2008.12.19 10:20:58Хичээл ордоггүй, ердөө 12 оюутан бэлтгэдэг хувийн дээд сургууль манайд байдаг гэвэл та итгэх үү.
Уг нь ийм тооны оюутантай дээд сургууль байх бүү хэл, 12 сурагчтай анги гэхэд хүн цөөтэйд тооцогддог биз дээ.
Саяхныг хүртэл ердөө 12-хон оюутантай байснаа нэмж 42 болгосон дээд сургууль нь "Замбуулин" нэртэй аж. Хичээл ордоггүй энэ сургуульд элссэн оюутнууд дөрвөн жил гутлынхаа улыг эргэтэл, гадуур дэмий тэнэдэг тухай гомдоллосон өргөдлөө Монголын оюутны холбоонд ирүүлсэн байна. Тухайн үед тус холбооны удирдлагууд оюутнуудаас ирүүлсэн энэ мэт гомдол, саналын дагуу БСШУЯ-тай хамтарч хувийн их, дээд сургуулиудад гэнэтийн шалгалт хийсэн гэдэг. Шалгалтаар "Тайз, дэлгэцийн урлагийн сургууль" хэмээх өвөрмөц тодотгол бүхий "Замбуулин" дээд сургууль хичээл заадаггүй нь тогтоогдсон байна. Өөрөөр хэлбэл, сургуулийн удирдлагууд хичээлийн эхний өдрөөс эхлэн элсэгчдээ хаа сайгүй байрлах хувийн хэвшлийн соёл урлагийн байгууллагуудад дадлагажигчаар "илгээдэг" байсан нь илэрсэн хэрэг л дээ.
Хаа холоос дээд боловсрол эзэмших гэж Улаанбаатарыг зорьж ирсэн хөдөөний хүүхдүүд юун тайз дэлгэцийн урлаг судлах манатай. Хуваарилагдсан соёлын байгууллагын ажилтны цай, кофег зөөсөөр сурсан ч юмгүй сургуулиа дүүргэдэг байжээ. Энэ бол одоогийн хувийн их, дээд сургуулиудын өнгө, төрхийг тодорхойлох энгийн жишээнүүдийн нэг. Ингээд тэр жил буюу 2005 онд "Замбуулин" дээд сургуулийг хааж, үйл ажиллагааг нь зогсоосон ч шүүхэдсээр байгаад дахин оюутан бэлтгэх эрхээ сэргээгээд авсан гэж байгаа.
Энэ мэт оюутан залуусаас хамгийн ихээр гомдол ирүүлдэг нэлээд хэдэн хувийн дээд сургуулиудын нэрс тодроод байгаа. Жишээ нь, "Хантайшир", "Харцага", "Цог", "Гэгээ", "Идэр" зэрэг дээд сургуулиудыг нэрлэж болно.
"Хантайшир" дээд сургууль гэхэд цэцэрлэгийн үйл ажиллагаа явуулах зориулалттай байранд хичээллэдэг байна. Сургуулийн номын сан, биеийн тамирын заал, оюутны дотуур байр гэж үгүй.
Хичээлийн 2-3-хан танхимтай, оюутнуудад ширээ, сандал хүрэлцдэггүй гэсэн гомдол тасардаггүй аж. Харин "Харцага" дээд сургуулийнхан гэхэд өнөөдрийг хүртэл сургалтын дэвтэргүй гэнэ. Багшлах боловсон хүчин хангалтгүй гэсэн дүгнэлтийг тус сургуулийн оюутнууд Монголын оюутны холбоонд ирүүлсэн байна. Түүгээр ч барахгүй, оюутнуудаас үе үе мөнгө хураадаг. Үүнийг эсэргүүцсэн оюутнууд өөр сургууль руу шилжих тухай өргөдөл өгсөн ч "Харцага" дээд сургуулийн удирдлагууд хүлээж авдаггүйг элсэгчид нь зохих байгууллагуудад мэдэгдсэн байх юм. Шилжих хүсэлт тавьсан оюутнуудын бичиг, баримтыг барьцаалчихдаг гэж байгаа. Мөн "Цог" дээд сургууль байна. Ажлын бүх өдрүүдэд энэ сургуулийн хаалга цоожтой байдаг гэж "Монголын оюутны холбоо"-ныхон хэлсэн. Энэ тухайгаа сургуулийн удирдлагууд хичээл багатай гэх мэтээр тайлбарладаг аж. Оюутнууд нь ч хичээл орох цагтаа орсонгүй хэмээн гомдоллоод байдаггүй. Идэвх муутай гэж байсан. Тэгсэн атлаа сар бүр автобусны билет авах "Цог" дээд сургуулийн оюутнуудын нэрс бүртгэгддэг байна.
"Гэгээ" нэртэй бас нэгэн дээд сургууль "Сансар"-т байрладаг аж. Хуучны нийтийн байранд сургалт явуулдаг энэ сургуулийн оюутнуудын хэдэнтээ гомдол ирүүлсэн нь сургалтын шаардлага хангахгүй байгаатай холбоотой юм билээ.
Нэлээд хэдэн жилийн өмнөөс банк, санхүүгийн чиглэлээр оюутан бэлтгэж ирсэн "Монрика" дээд сургуулийн үйл ажиллааг өнгөрсөн жил зогсоосон гэсэн. Ингэх болсны гол шалтгаан дээр дурдсан зөрчлүүдээс дутагдах юмгүй. Гэтэл шаардлага хангаагүй энэ сургууль өнөө жилээс нэрээ өөрчилж "Үндэсний гэрэл" дээд сургууль болжээ. Шинэхэн нэрээр оюутан элсүүлэх болсон энэ дээд сургуультай холбоотой гомдол, санал одоо ч тасардаггүй бололтой.
"Нарантуул" захын хажууханд байрладаг "Идэр" дээд сургуулийн оюутнууд хичээлээ олон цагаар тасалдаг болоод уджээ. Энэ нь захын ойрхон байрладгаас шалтгаалдаг юм байна. Оюутнууд хичээл таслах болсон шалтгаанаа "Нарантуул" захын чимээ, шуугиан ихтэй байдагтай холбон тайлбарладаг аж. Тиймдээ ч ангиараа шахам хичээлээ тасалж, зах хэсдэг болжээ. Сургуулийн удирдлагууд хуучнаар Багшийн дээдийн ойролцоо хичээлийн шинэ байр барьж үйл ажиллагаагаа эхэлсэн ч оюутнууд нь өмнөхөөс илүү их шуугиантай гэж гомдолложээ. Оюутнууд хичээлээ тогтмол тасалдаг хэвээр гэнэ.
"Ирээдүй", "Монфреш", "Мөнх-Ану", "Их-шавь", "Гурван тамир", "Сан" зэрэг дээд сургуулиуд Баруун дөрвөн замын хойхно нэг жижиг байшинд шавааралдан байдаг. Эдгээр сургуулиудад хоёр жилийн өмнө БСШУ-ны сайд асан Ө.Энхтүвшин гэнэтийн шалгалт хийж сандаргасан. Тэр үед "Ирээдүй" дээд сургуулийн хичээлийн байранд гэхэд гуталчин, зурагт засвар, саун, кафе, тэр бүү хэл эмэгтэйчүүдийн эмнэлэг ч ажилладаг байсан нь илэрсэн. Харин өдгөө эдгээр үйлчилгээний газрууд сургуулийн байранд биш хажууханд байрладаг болсон нь ололттой ч сургалтын чанар өнөө л шаардлага хангадаггүй хэвээр гэдгийг Монголын оюутны холбооны залуус онцолсон.
Одоо байдал ямар байгааг үзэхээр тухайн сургуулиудыг зорив. Сургуулийн хашааны үүдэнд шахам хэд хэдэн ломбард, гоо сайхны салон, ТҮЦ байрлах нь сургуулийн төрхийг улам ч даржээ.
Тэндхийн ломбардууд ойрын өдрүүдэд нэлээд ашигтай ажиллаж байгаа гэсэн. Тодруулбал, оюутны өвлийн амралт дөхөж, их, дээд сургуулиудын явцын шалгалт эхэлсэн тул үйлчлүүлэгчдийн тоо нэмэгдсэн гэх. Энэ нь эдгээр хувийн дээд сургуулиудын багш нар гаргасан номоо оюутнуудад "шахах" болсонтой холбоотой юм байна. Тэд ч онц авахын тулд багшийн номыг худалдаж авах хэрэгтэй болно. Тиймээс оюутан залуус үнэт эдлэл, гар утсаа ихээр ломбарддаг болж. Ном худалдаж авч л байвал, оюутнууд шалгалтгүйгээр тэнцэнэ гэсэн сэтгэлгээнд багш нар нь сургаж байгаа бололтой юм.
Хаа сайгүй хямрал ярих болсон энэ үед хувийн дээд сургуульд суралцагсдыг түгшээх болсон нэг зүйл нь сургалтын төлбөрт алданги тооцох явдал аж. Нэг ёсондоо сургалтын төлбөрөө заасан хугацаанд багтаж төлөөгүй тохиолдолд алданги тооцдог болжээ. Сургууль бүрийн алданги харилцан адилгүй бөгөөд удирдлагууд нь сургалтын чанарт биш төлбөрт ихээхэн анхаарал тавьдаг гэж байна. Тэдний хувьд сургуулийг хаах шийдвэр гаргасан ч төдийлөн санаа зовнидоггүй гэж байсан. Учир нь танил талаар яриулж байгаад эрхийг нь сэргээчихдэг. Энэ бүхний цаана, хувийн дээд сургуулиудын эзэд ихэнхдээ УИХ-ын гишүүд байдаг болохоор хичээл заах эрх хасагдсан, хаагдсан ч хууль үйлчилдэггүй гэж холбогдох байгууллагын удирдлагууд хэлнэ лээ. Их, дээд сургуулиудад шалгалт хийж, оюутан залуусын эрх ашгийн төлөө дуугарснаараа "Монголын оюутны холбоо"-ны залуус хэдэнтээ төрийн түшээдэд "уургалуулсан" гэх юм.
Юутай ч Монгол Улсын ирээдүйн шинэ, залуу боловсон хүчнүүд ийм л түвшинд бэлтгэгдэж, мэдлэг авсан болоод төгсч байна гэхээр эмгэнэлтэй дүр зураг харагдаж байгаа биз. Монголын боловсрол ингэтлээ ядуурч, дээсэн дөрөөн дээр дэнжигнэж байгаа нь сүйрэл биш гэж үү.