April 29, 2009. 5:31 pm
Премьер лигийн түүхэн дэхь хамгийн том өрсөлдөгчид энэ жилийн Аваргуудын лигийн шөвгийн дөрөвт учраа таарчээ. 1992 онд Премьер лиг байгуулагдсанаас хойшхи он жилүүдэд аваргын төлөөх тулаан ердөө л энэ 2 багийн хооронд өрнөж байсан гэхэд нэг их хилсдэхгүй . Нийт 16-н удаагийн тэмцээний 10 түрүү нь МанЮ-д хамааралтай бол Арсенал гурван удаа магнайлж байсан. Энэ бүгдээс шалтгаалан хоёр багийн тулаан нэг үе европийн хамгийн сонирхолтой дербинүүдийн нэг байлаа. Нэг нэгнээ зуух нь холгүй болдог байсан тэр үеийн тоглолтууд хөлбөмбөг сонирхогчдийн санаанд одоо ч тод байгаа билээ. Кийн-Виера, Анри-Рүүд гээд олон домогт тоглогчид энэ 2 багийн өрсөлдөөнийг чимсээр ирсэн.
Гэвч цагийн эрхээр Арсеналын оргил үе өнгөрч үзүүлэх амжилт нь саарснаар энэ 2 багийн өрсөлдөөн нэг хэсэг намжаад байсан юм. Магадгүй энэ жилийн Аваргуудын лиг дэх оноолт тэртээх ширүүн тулааныг сэргээж болох юм. Өнгөрсөн жилийн дөрвөн сар хүртэл Премьер лит түрүүлэх хамгийн магадлалтай багуудаар энэ хоёр нэрлэгдэж байсан. Харамсалтай нь өвлийн завсарлагаас хойшхи Арсеналын муу амжилт чөтгөрүүдэд түрүүлэх боломжыг олгосон билээ.
Серийн цэргүүд Аваргуудын лигт гурвантаа магнайлж байсан гайхалтай түүхээрээ бахархдаг бол буучдад финалд шалгарснаас өөр гялтайх амжилт үгүй. Хэрвээ Арсенал энэ жил тэмцээнд түрүүлбэл өөрийн багийн түүхэнд нэгэн шинэ үеийг нээгээд зогсохгүй Лондоны багуудаас анх удаа энэ цомыг авсан баг болох юм. Харин Улаан чөтгөрүүд заналт дайсан Ливерпулийн хамгийн олон Аваргуудын лигийн цомтой английн баг гэсэн амжилтыг эвдэхэд нэг алхам ойртоно.
Дасгалжуулагчийн хувьд дадлага туршлагаараа хэн хэнээсээ дутаад байхгүй хоёр эрхэм энэ хоёр багийг удирддаг. Премьер лигт ажилласан жил нь 10-н зөрөөтэй болохоос дэлхийн ямар ч багт очсон Арсене, Фергусон нарыг нэгэн ижил уур амьсгал угтан авах нь дамжиггүй. Тэд сүүлийн 13 жил лиг болон цомын тэмцээнд өчнөөн удаа таарч байсан ч европын дэвжээнд анх удаа ийнхүү тулах гэж байна. Арсенал-МанЮ хоёр премьер лигт нийт 37 удаа таарч байснаас Венгер 14 удаа цэнгэлдэхийг ялагчын дүрээр орхин явж, 13-т нь Шотланд өвөө тэр мэдрэмжийг нь мэдэрч байжээ. Харин үлдсэн 10 тоглолт нь эвийн гэрээгээр өндөрлөж байсан аж. Хамгийн сүүлийн тоглолтын тухайд өнгөрсөн жилийн 11-р сард таарсан ба Самир Насригийн дублийн ачаар лондончууд ялалт байгуулсан гэдгийг та бүхэн санаж байгаа байх. Харин түрүү жилийн хавар Арсенал Олд Траффордод Роналду болон Харгривз нарын гоолын ”ачаар” ялагдал хүлээж лигийн өрсөлдөөнөөс нэгмөсөн хасагдаж байсан байх юм.
Хоёр багийн түүхэндээ хийсэн бүх тоглолтыг нь авч үзвэл тийм ч бага тоо гарахгүй. Нийт 204 удаа таарч байснаас Чөтгөрүүд 82-т нь дийлж , Арсенал таваар бага буюу 77 тоглолтонд өрсөлдөгчөө сөхрүүлж байж. Цомын тэмцээний хамгийн сүүлийн ”учрал” нь өнгөрсөн жилийн ФА цомд тохиож МанЮ 4 : 0-р бутниргэж байсан байна.
Улаан чөтгөрүүд Аваргуудын лигт 23 тоглолт ялагдаагүй гэсэн сүрдэм амжилтаа үргэлжлүүлэхээр бэлдэж буй ч хагас шигшээд амжилт муутай үздэг түүх тэдэнд бий. Тодруулбал нийт 10 удаа тэмцээний шөвгийн дөрөвт шалгарснаас ердөө гуравт нь л ялалт байгуулж үлдсэн долоод нь ялагдал хүлээж байжээ. Сонирхуулахад саяхан Английн оны шилдэгээр тодорсон МанЮ-н домогт цэрэг Райнг Гиггз энэ тоглолтонд оролцвол багийнхаа төлөө хийж буй 800 дахь тоглолтоо нь болно. .
Арсенал түүхэндээ нэг удаа л шөвгийн дөрөвт шалгарч байсан. Тэр нь 2005-2006 оны улиралд тохиосон ба Испаний Вильяреалыг ялж финалд үлдэж байсан билээ. Гэхдээ нутгийнхаа багтай буучид Аваргуудын лигт таарахаараа муу тоглоод байдаг уламжлалтай. Өнгөрсөн жил л гэхэд Ливерпульд ялагдаж тэмцээнээ өндөрлөсөн бол 2004 онд Хөхүүдийн аманд очиж өвдөг шороодсон билээ.
Бүрэлдэхүүн : МанЮ-гийн Гэри Невиль, О’ши нар бэртэлтэй байгаа тул Рафаель да Силва баруун ард гарах байх. Буучдаас хувьд гол довтлогч Ван Перси, хамгаалагч Клиши хоёр талбайд гарахгүй ба тэднийг Бендтнер, Гиббс нар орлох байх. Мөн Майкл Селвистер бага зэргийн бэртэлтэй байгаа тул Доуроуд түүнийг байрлалыг даатгах аж.
Хоёр багийн сүүлийн 5 тоглолтын дүн
МанЮ
4.25: МанЮ 5-2 Тоттенхэм
4.22: МанЮ 2-0 Портсмут
4.19: МанЮ 0-0 Эвертон
4.15: Порту 0-1 МанЮ
4.11: Сандерлэнд 1-2 МанЮ
Арсенал
4.26: Арсенал 2-0 Мидлсборо
4.21: Ливерпуль 4-4 Арсенал
4.18: Арсенал 1-2 Арсенал
4.15: Арсенал 3-0 Вильяреал
4.11: Уйган 1-4 Арсенал