Үзэгчдийн хүсэж байсан шиг үзүүштэй тоглолт Ноу Кампт өрнөсөнгүй. Топ багуудын хэт бие биенээ цэнэсэн уйтгартай тоглолтын эцэст хөлбөмбөгийн хамгийн сонирхолгүй үр дүн буюу 0 : 0-р Барса-Челсигийн тоглолт өндөрлөлөө. Мэдээж энэ тэнцээ Лондончуудад давуу талыг авчирч байна. Тэд долоо хоногийн дараа Стэмфорд Бриджэд ганц гоол оруулахад л финалд шалгарах болзлоо хангана. Үүнээс гадна багийн ахлагч Карлос Пуйоль, Рафa Маркез нар хариу тоглолтонд оролцохгүй болсон нь Каталончуудад аюулын харанга дэлдэж буй. Мексик хамгаалагчийн хувьд бүр улиралд дуустал талбайд гарах боломжгүй болсон мэдээ байна. Хоёр багийн довтлогчид энэ өдөр үүргээ тун хангалтгүй гүйцэтгэж байсан бол эсрэгээрээ хаалгач, хамгаалагчид гоол оруулах боломж болгоныг үгүй хийж байлаа.  Гуус Хиддинк тоглолтын дараа ”Барса сайн тоглосон. Тэднийг гоол оруулахад саад болж байсан ганц зүйл нь Чех байлаа. Бас бага зэрэг аз энэ тоголтын хувь заяанд нөлөөлсөн гэвэл үнэнд нийцэх байх. Одоо гол тоглолт Лондонд болно” гэжээ.

“Барселона” (Испани) - “Челси” (Англи) - 0:0