Хүү минь чамайгаа би үүрд жаргаана гэж амлахгүй

Хорвоог туулах замд чинь харин дэм болж явна аа

Алдрайхан чамайгаа би алган дээрээ амьдруулахгүй

Алдартан эсвэл аниргүйтэн болохоо өөрөө шийдээрэй

Үрдээ нэр олох гэж битгий зовоосой гэсэндээ

Хүү минь чамайгаа би их оюунт болгоно оо

Үйлсдээ бие нь битгий бүдрээсэй гэсэндээ

Үр минь чамайгаа бардам бялдарт болгоноо

Найранд нүүрийг чинь улайлгахгүй гэсэндээ

Намуухан хоолойгоор бүүвэй аялана аа аав нь

Наадамд барилдахгүй ч нурмайж бүү алхаг гэж

Насандаа багтахгүй аагтай болтол чинь хөөргөнө өө

Төөрөлдөж будилахгүй төрөө дээдэлж яваг хэмээн

Түүх, шастир, хууль журам юухныг сургана аа эцэг нь

Түвшин бодолтой явахад чинь дэм өгөхийг бодож

Тэвчээр хатамжлалыг дээдлэхийг заана аа хүүдээ

Өөгүй амьдрал үгүй тул доройтоход чинь бэлтгэж

Өлсгөлөн, нимгэн, ядрууг ч амсуулна аа бүү гомдоорой

Өөлүүлж, муулуулж, зутруу үг сонсох үе ирнээ

Өмнө нь хүүгээ хатуу үгэнд дасгана аа битгий шаналаарай

Өвгөдөөс уламжлуулсан оюуныг үрдээ өвлүүлж

Өөд дэвжихийг чинь харж баясах цагийг хүлээе үр минь

Өөрийнхөө ээж шиг эрхэмсэг бүсгүйтэй гэр бүл болоод

Өвөрт минь ач даалгахыг чинь харан сууя хүү минь ээ