Таны аз жаргал амьдралд хандах хандлага дээр үндэслэдэг гэдэгтэй та санал нийлэх үү. Хүн хэдий хэр аз жаргалаа мэдэрнэ төдий чинээ сэтгэл санаа нь өөдрөг болдог юм.
Аз жаргал. Энэ бол сонголт. Хаана ч, хэдийд ч хийж болох таны л сонголт. Хэрэв та аз жаргалыг энэ өнцгөөс харж чадвал ямар ч бэрхшээл, сэтгэлийн тавгүйрлийг эерэг тал руу нь эргүүлж чадна. Яагаад гэвэл та аливаа бүхнээс ямар нэг эерэг талыг нь олж хардаг болно.
Стресст орсон үедээ өөртөө гурван асуултыг заавал тавих хэрэгтэй. Үүнд:
1. Одоогийн энэ нөхцөл байдалд юу нь гайхалтай байна?
2. Өөр юу хийх хэрэгтэй вэ?
3. Тухайн байдлыг засах, түүнээс сэтгэлийн таашаал авахын тулд юу хийж чадах вэ?
Хүнийг гадаад байдал бус харин дотоод бодол санаа нь аз жаргалтай болгодог. Энэрэнгүй байдал нь аз жаргалын үрийг тарьдаг гэж ч хэлдэг. Хэрэв та бодол санаагаа удирдаж чадвал өөрийн аз жаргалыг олж чадна.

Биеийн хүч
Хөдөлгөөн нь хүний мэдрэмжид нөлөөлдөг. Биеийн хүчний хөдөлгөөн нь стрессыг арилгаж, биеийн эд эсийг химийн урвалд оруулснаар өөрийгөө илүү сайнаар төсөөлөх боломжтой болгодог. Иймд биеийн тамирын дасгал хөдөлгөөнийг аль болох тасралтгүй, нэг удаад гучин минутаас доошгүй хугацаагаар хийж байх хэрэгтэй юм шүү. Хооллолт, хоол хүнс нь таны эерэг, сөрөг мэдрэмжэд шууд нөлөөлдөг. Та бас кофе, цай, алкоголь, сахараар баялаг бүтээгдэхүүн, нэмэлт аминдэм эрдсийн бэлдмэлээс аль болох татгалз. Харин түүний оронд жимс, ногоо, шош, буурцгийг хоол хүнсэндээ түлхүү хэрэглэхийг хичээ.

Агшин дахь амьдралын хүч
Аз жаргалыг та жил, сар, долоо хоног, өдрөөр бус харин хором тутамд мэдэрч болно. Мэдээж үүнд таны өөрийн дурсамж ихээхэн нөлөөтэй. Хэрэв та өөрөө хичээвэл стрессээс салж, амгалан тайван орчинг бүрдүүлж болно.
Хамгийн гол нь таны хувьд амьдралын өдөр бүр шинэлэг байдлаар эхлэх нь юу юунаас ч илүү чухал юм.

Зорилгын хүч
Зорилго нь бидний амьдралыг утга агуулгатай болгодог. Хэрвээ бид зорилготой бол бид амжилтад анхаарлаа төвлөрүүлдэг юм. Зорилго нь хүнд хэцүү үеийг илүү хялбар илүү таатай болгож өгдөг. Иймд та өөрийн зорилгоо заавал бич. Түүнийгээ дахин дахин харж сана. Өглөө босоод, өдрийн туршид, унтахын өмнө гээд боломж гарах бүртээ түүнийгээ эргэн харж байгаарай.

Инээмсэглэлийн хүч
Хошин шогийн мэдрэмж нь стрессыг тайлдаг гэж болно. Инээд, хөгжөөнтэй зан байдал нь анхаарлаа төвлөрүүлэхэд туслаад зогсохгүй, асуудлыг ухаалаг шийдэхэд тусладаг. Ямар ч нөхцөл байдлаас инээдтэй хошин талыг нь олж харж болно шүү дээ. “ Энэ тохиолдолд юу инээдтэй байна”, “Юу инээдтэй байж болох”, “Юу муу байж болох” –ыг өөрөөсөө асуу.
Стрессын эсрэг дараах томъёололд анхаарлаа хандуулаарай.
"Жижиг зүйлд санаа зовох хэрэггүй".

"Гэхдээ амьдралын ихэнх хэсэг жижиг зүйлээс тогтдог” гэдгийг сана.

Уучлахын хүч

Жинхэнэ аз жаргалыг мэдрэхийн үүд хаалга нь уучлахын ухаан гэдэг. Хэрвээ таныг дан ганц гомдол, хорсол, үзэн ядах сэтгэл эзэмдсэн бол аз жаргалыг мэдрэх боломжгүй юм. Та гомдол, хорсох сэтгэлд автсан бол танаас өөр хэн ч зовохгүй.
Алдаа, амжилтгүй байдал нь амьдралын сургуульд таныг сургадаг юм. Тиймээс өөрийгөө уучилж байх хэрэгтэй.

Өгч сурахын хүч
Аз жаргал нь бусдад өгч бусдад туслах ухаанд нуугдаж байдаг гэдэг. Бусдад баяр баясгалан хэдий хэр бэлэглэнэ төдий чинээгээр аз жаргалыг олж авдаг.

Харилцан хамаатайн хүч
Амьдралын чанар нь хүмүүсийн харилцаан дээр л тогтдог юм. Мэдээж хэн ч эзэнгүй хоосон арал дээр цор ганцаар амьдрахыг хүсэхгүй. Хүмүүсийн ойр дотно харилцаа холбоо нь цагийг таатай өнгөрүүлэхэд тустайн дээр, хүнд бэрх үеийг илүү хялбар болгодог. Хэрвээ та олон найз нөхөдтэй бол таны баяр баясгалан, зовлон бэрхшээл аль аль нь төдий хэмжээгээр хуваагдана гэсэн үг.

Итгэлийн хүч
Итгэл бол жинхэнэ аз жаргалын эх суурь нь болдог. Итгэлгүйгээр урт удаан аз жаргалын тухай төсөөлөх ч хэрэггүй. Итгэл нь танд бусдад итгэх итгэлийг хайрлаж, таны оюун ухааныг эргэлзээ, түгшүүр, айдас, тайван бус байдлаас чөлөөлж өгөх болно.