Таван жилийн өмнө дампуурлаа зарлаж байсан Грек улс Европын холбоо болон Олон улсын валютын сангаас хатуу нөхцөлтэйгөөр их хэмжээний зээл авсан билээ. Грекийн нийт өрийн хэмжээ 320 тэрбум еврод хүрсэн бөгөөд энэ нь тус улсын ДНБ-ий 177 хувьтай тэнцэж байгаа аж.

Харин /V.12/ Грекийн Засгийн газар 760 сая еврог Олон улсын валютын санд эргэн төлөх эцсийн хугацаа байсан ба энэ сарын 5-н гэхэд тэд Олон улсын валютын санд 1.6 тэрбум еврог буцаан төлөх ёстой байсанюм. Европын холбооны орнууд болон Грекийн эрх баригчид Брюселд уулзаж, Афины өрийн эргэн төлөлтийн тухай хэлэлцсэн боловч тэд тодорхой шийдэлд хүрээгүй ба Грекийн төлөөлөгчид Брюссель, Европын Төв банк болон Олон Улсын Валютын сангаас тавьсан шаардлагыг хүлээн зөвшөөрөхөөс татгалзсан учир хэлэлцээр гацсан юм.

Харин хамгийн сүүлийн байдлаар Грек улс зургаадугаар сарын 30-н гэхэд ОУВС-д 1.6 тэрбум еврогийн өрөө эргүүлэн төлөхөөр болжээ. Хэрэв зургаадугаар сарын 30-н гэхэд хэлэлцээр хийгдэхгүй бол Грек өрийн дампуурал буюу дефолтын эрсдэлтэй тулгарна.

Хүүгийн төлбөрийг төлөхийн тулд тэтгэврийн хэмжээг бууруулж, татвар нэмэхгүй гэсэн хатуу байр суурийг Грекийн эрх баригчид баримталж байна. Энэ бол эрх баригч намын сонгуулийн гол амлалт байсан юм.Түүнчлэн ням гарагийн орой Афин хотод олон мянган Грекчүүд бүсээ чангалах арга хэмжээ авахгүй гэж амласан зүүний жигүүрийн Засгийн газраа дэмжин жагссан байна.

Мөн Белгийн нийслэл Брюсель хотноо Европын холбооны удирдлагууд чуулж байгаа бөгөөд тэд Грекийг олгосон хугацаанд нь өрөө барагдуулахыг шаардсан аж. Уг чуулга уулзалтад оролцож буй Францын Ерөнхийлөгч Франсуа Олланд “Грект дахин боломж олгохыг хүсэхгүй байна” гэсэн бол Германы Канцлер Ангила Меркел “Хангалттай хугацаа өгсөн гэж бодож байна. Грек заасан хугацаанд өрөө барагдуулахёстой” гэж мэдэгджээ.

Л.Баяр