Улаанбаатар хотын захирагч  Э.Бат-Үүл 2012 оны сонгуулийн дараа ажлаа авснаас хойш хамгийн рейтинг өндөртэй улстөрчөөр шалгарах хэмжээнд явж байсан ч олж авсан нэр хүндээ шавартай хутгаж орхилоо.

Э.Бат-Үүл даргын  санаачилсан автомашины дугаарын хязгаарлалт бүтэн хоёр жил үйлчилсэн ч үнэндээ үр дүнгээ өгсөнгүй. Замын түгжрэл хивэндээ л байна хэмээн бухимдах иргэд цөөнгүй. Үүнээс гадна дугаарын хязгаарлалтыг тэгш сондгой болгоно хэмээн нийгэмд яриа цацагдахад иргэдийн бухимдал дээд цэгтээ хүрч байв.

Тодруулбал, энэ зун хотод хийгдэх дулааны шугам сүлжээний томоохон засвар шинэчлэлт, авто замын бүтээн байгуулалтын ажилтай холбоотойгоор зургаадугаар сарын 15-н буюу ирэх долоо хоногийн Даваа гарагаас эхлэн хотын төвийн бүсэд автомашиныг улсын дугаарын тэгш сондгойгоор хязгаарлан замын хөдөлгөөнд оролцуулах болсон талаар НЗДТГ-аас мэдээлж байсан.

Мөн нийслэлийн Засаг дарга Э.Бат-Үүл “Энэ зун нийслэлийн гудамж замуудад багагүй өргөтгөл шинэчлэлт хийх тул төвийн замыг ийнхүү хаах юм. Тиймээс иргэд жолоочид замын хөдөлгөөнд соёлтой, хүлээцтэй хандахыг хүсч байна. Мөн замын засвар ирэх наймдугаар сарын 14-нд дуусна. Энэхүү засвар хийгдэж дуусмагц буюу ирэх наймдугаар сарын 15-наас автомашины дугаарын хязгаарлалтыг бүрмөсөн цуцлах санал гаргасан. Гэхдээ эцэслэн шийдээгүй байна” гэсэн мэдээллийг өглөө.

Тэгвэл энэ асуудлыг Нийслэлийн Удирдлагын зөвлөлийн өчигдрийн хуралдаанаар хэлэлцэв.Улаанбаатар хотын замын хөдөлгөөний ачааллыг зохицуулах ажлын хэсгийн ахлагч н.Гантөмөр "Дулааны шугам солих ажлын хүрээнд Төв шуудангийн уулзвараас Цэцэг төвийн уулзвар хүртэл төв замыг хаагаад байгаа хэдий ч замын ачаалал төсөөлж байснаас бага байгаа учир хотын төвийн бүсэд автомашиныг хөдөлгөөнд оролцуулахдаа улсын дугаарын тэгш сондгойгоор хязгаарлахыг хойшлуулах санал гаргаж байна" гэв. 

Нийслэлийн Удирдлагын зөвлөлийн хуралдаанаас дээрх ажлын хэсгийн дүгнэлтийг үндэслэн автомашины улсын дугаарын тэгш сондгойгоор хязгаарлахыг тодорхойгүй хугацаагаар хойшлуулахаар шийдвэрлэлээ. Үүнийг сонссон иргэд түр ч болов тайвширсан бололтой. Зөв шийдвэр байна. Цаашдаа ч гэсэн ийм байгаасай гэж ярих нь бий. 

А.Ханд