Японы мэргэжлийн сүмогийн холбооны "Ёкозүнагийн асуудал эрхэлсэн хороо" уламжлал ёсоор Нацү башёгийн дараа хуралдлаа. Тус хорооны тэргүүн Хидэшигэ Мория дээд зиндаанд түрүүлсэн зургаа дахь монгол бөх Тэрүнофүжи Г.Ган-Эрдэнийг магтаж “Тэр озэки цолтны хэмжээнд барилдаж байна. Удахгүй ёкозүна цолны болзол сонсгох талаар ярилцах хэрэг гарах байх” гэжээ. Манай залуу хүчтэн Тэрүнофүжи маргааш озэки цолоо албан ёсоор авах юм.
Харин энэ сарын тэмцээнд 11-4 амжилт үзүүлсэн Их аварга Хакүхо М.Даваажаргалыг “Түүний урьдын хүч чадал, тэмүүлэл алга болсон юм шиг санагдсан” хэмээн шүүмжилжээ. Энэ сард аварга маань задгай барилдаж, озеки Гойёдод унаад дэвжээнээс гомдолтой буусан, түрүү башёд шүүгч нарыг шүүмжилсэн зэрэг нь олны хараанд өртөөд байгаа юм.
Мөн уг хорооноос аварга Какүрюү М.Анандын гэмтлийн тухай хэлэлцэн “Нагоя башёд заавал барилд гэж шахахгүй” гэсэн шийдвэр гаргажээ.
