Нийслэлийн иргэд өнөөдрөөс эхлэн “Ухаалаг автобус”- аар зорчихоор болж байна. Их хотын иргэдэд зорчигч тээврийн үйлчилгээ үзүүлэх 30 ”Ухаалаг автобус” төхөөрөмжөө суурилуулан, үйлчилгээнд гарахад бэлэн болжээ. Өнөөдрийн байдлаар 20 автобус, 10 троллейбусанд “Ухаалаг” төхөөрөмж суурилуулаад байгаа аж. Тодруулбал, III, IV хороолол-Шар хад, “Мишээл экспо”-Сүхбаатар дүүргийн II хороо чиглэлийн 20 автобус, III, IV хороолол-Барилгын машин механизмын завод чиглэлийн арван троллейбусанд тоног төхөөрөмж суурилуулан, туршилтад гаргаад байна. Иргэн та “Ухаалаг автобус”-нд суухдаа заавал урд хаалгаар орж, арын хаалгаар буух ёстой бөгөөд жолоочийн хажууд байршуулсан карт уншигч төхөөрөмжид “Цахим карт”-аа ойртуулан уншуулахад дуут дохиогоор хариу өгнө. Харин буухдаа арын хаалганы дэргэдэх төхөөрөмжид “Цахим карт”-аа дахин уншуулна. 

Төслийн эхний ээлжид бэлэн мөнгөөр давхар үйлчлэх юм. Бэлэн мөнгөөр үйлчлүүлэхдээ жолоочид мөнгөө шалгуулан бэлэн мөнгөний хайрцагт хийх бөгөөд хариулт өгөх боломжгүй тул зорчигчид яг таарсан мөнгөтэй байх шаардлагатай. Билет таслагч буюу кондукторууд хяналтын ажилтны үүрэгтэйгээр ажиллах юм байна. Энд ашиглах эхний ээлжийн 700 мянган картыг Солонгост үйлдвэрлэжээ Төслийн хүрээнд “Хэрэглэгчийн төв” байгуулах бөгөөд “Цахим карт”-тай холбоотой асуудлаар иргэдэд үйлчлэх юм байна Ухаалаг автобус”-аар ахмад настан, хөгжлийн бэрхшээлтэй иргэн, цагдаагийн албан хаагч оюутан, сурагчид одоо үзүүлж буй картаараа үйлчлүүлж, бусад иргэн цахим картыг худалдан авч үйлчлүүлэх учиртай. Өнөөдрийн байдлаар тоног төхөөрөмж, системийн ажиллагааг туршиж байгаа бөгөөд ирэх долдугаар сарын эхээр Улаанбаатар хотын нийтийн тээврийн үйлчилгээнд явж буй 1200 орчим автобусанд уг тоног төхөөрөмжийг бүрэн суурилуулахаар төлөвлөж байгаа аж.