Испанийн эзэн хааны "Реал Мадрид" клуб Ла Лигийн 19 дүгээр тойргийн хүрээнд "Кордоба" клубын талбайд зочлон тоглож, 2-1 харьцаатай буулгаж авсанаар хүснэгтийг тэргүүлсэн хэвээр үлдлээ.

Тоглолтын хоёр дахь минутад "Реал Мадрид"-ын хамгаалан тоглогч Серхио Рамос өөрийн 16 метрийн торгуулийн талбайд бөмбөгөнд гар хүрсэнээр эсрэг багтаа торгуулийн цохилт бэлэглэсэн. Ингэснээр тоглолтын гурв дахь минутад эсрэг багийн довтлогч Гилас 11 метрийн торгуулийн цохилтоос гоолдон, тооны харьцааг 1-0 болгосон юм. Гэвч тоглолтын 27 дахь минутад Франц довтлогч Карим Бензема тооны харьцааг тэнцүүлсэн.


Эзэн багийн хувьд тоглолтын дундуур хэд хэдэн аюултай довтолгоо зохион байгуулж тооны харьцааг холдуулах боломжтой байсан ч үүнийгээ ашиглаж чадаагүйн гор гарч тоглолтын 88 дахь минутад эсрэг багтаа торгуулийн цохилт бэлэглэсэн юм. Үүнийг нь Уэльс залуу Гарет Бэйл алдалгүй ашиглаж тооны харьцааг 2-1 болгосноор багтаа хожил авчирсан.

Мөн тоглолтын 82 дахь минутад "Реал Мадрид" клубын супер од Кристиано Роналдо эсрэг багийн хамгаалагч дээр алдаа гаргасныхаа улмаас улаан хуудас авч талбайг чөлөөлсөн юм. Харин түүний үйлдэлд Испанийн хөлбөмбөгийн холбооноос нэг тоглолтоор бус гурван тоглолтоор ч торгож магадгүй байдалд ороод байна.


Одоогийн байдлаар "Реал Мадрид" клубын хувьд 19 тойргийн дараах байдлаар 48 оноотой болж хүснэгтийг тэргүүлсэн хэвээр үлдсэн. Мөн тэдний хувьд бусад багуудаас нэг тойргийн тоглолт дутуу яваа учир тэрхүү тоглолтдоо хэрэв ялалт байгуулж чадвал тэдний ардаас нэхэж буй "Барселона" клубээс даруй дөрвөн онооны зөрүүтэй хүснэгтийг тэргүүлэх боломжтой байгаа юм. Харин өнөөдөр тэдэнд хожигдсон "Кордабо" клубын хувьд 20 тойргийн дараах байдлаар 18 оноотой хүснэгтийн 14 дүгээр байрт бичигдсэн хэвээр үлдлээ.