9911, 8811 зэрэг дугаар ашигладаг иргэдийн гар утсанд үл таних дугаараас биеэ үнэлэх утга бүхий “175 см өндөртэй, 23 настай, царайлаг ганц бие эмэгтэй гэртээ ганцаараа уйдаад сууж байна. 

70 мянган төгрөгөөр хамт хонож болох юм” гэсэн мессеж илгээж, бусдыг дарамталж мөнгө авдаг сэжигтэй этгээдийн талаар мэдээлэл цагдаагийн байгууллагад бүртгэгдсэн байна.

Тэгвэл сэжигтэнийг олж тогтоон эрүүгийн хэрэг үүсгэн мөрдөн байцаалтын үйл ажиллагаа эхлээд байгаа гэнэ.

Түүнчлэн 9963.... дугаарын утаснаас айлган сүрдүүлсэн гэх асуудалд шалгагдаж торгуулийн арга хэмжээ авч, бусдын биед хөнгөн гэмтэл учруулж, Багануур дүүргийн Цагдаагийн хэлтэст шалгагдаж байсан нэгэн гэнэ.

Өнгөрсөн оны арваннэгдүгээр сарын 28-ны өдөр иргэн Н-ийн 8811”’”’” дугаарын утсанд 8880 дугаарын утаснаас мессеж илгээж, харилцан мессеж бичиж, утсаар ярилцжээ.

Улмаар “Надад мөнгө хэрэгтэй байна, хэрэв өгөхгүй бол надтай харилцан бичсэн мессежүүдийг чиний Фейсбүүк хаягны бүх найзуудад чинь тараах болно” гэж хохирогчийг сүрдүүлж аргагүй байдалд оруулж, улмаар 400 мянган төгрөг авсан аж.

Мөн иргэн “Н”-ийн эхнэрт дарамталсан утгатай мессежүүдийг удаа дараа илгээн, хохирогч “Н”-ээс дахин мөнгө нэхэж, бэлгийн харьцаанд орохыг ч тулган шаардсан аж.

Энэ мэт 9911,8811 эсхүл азын дугааруудыг таамгаар цуглуулж биеэ үнэлэх утга бүхий мессежийг илгээн хохирогчийн хувийн мэдээллийг өөртөө цуглуулан, эргүүлж дарамтлах байдлаар гэмт хэргийн санаа зорилгоо хэрэгжүүлж байжээ.

Тиймээс иргэдийг энэ төрлийн гэмт хэргээс урьдчилан сэргийлэхийг ЦЕГ-аас анхааруулж байна.