Ажилаа аль эрт орхисон хэрнээ байгууллагаасаа халагддаггүй сонирхолтой явдал Энэтхэгт гардаг аж. Нью-Дели хотын Нийгмийн асуудал эрхэлсэн ерөнхий департаментад (CPWD) ажилладаг Верма гэх нэгэн этгээд 24 жилийн турш тус байгууллагын ажилтнаар тооцогдсоор байгааг тогтоосоны дараа Энэтхэгийн Хотын хөгжлийн яамны сайд Венкаиах Найду (Venkaiah Naidu) уг этгээдийг ажлаас нь халсан гэнэ.
Нэр ус нь тодорхойгүй, нууцалсан, зөвхөн А. К. (A. K. Verma) нэрийн дор бүртгэлтэй, цахилгааны инженер мэргэжилтэй уг ажилтан аль 1990 оны арванхоёрдугаар сард амралтаа аваад эргэж ажилдаа ирээгүй байхад өнгөрсөн хугацаанд түүнийг бүр тушаал дэвшүүлж, гүйцэтгэх инженер болгосон байжээ.
Reuters агентлагийн тэмдэглэснээр, дэлхий дахины хамгийн хатуу чанд хуулиуудын тоонд ордог Энэтхэгийн хөдөлмөрийн хууль ёсоор хэрвээ байгууллагын ажилтан, албан хаагчид эрүүгийн гэмт хэрэг өдүүлээгүй л бол ажлаас нь халах ёсгүй байдаг аж.
Харин Верма нэртэй уг этгээд байгууллагадаа арван жил ажилласан бөгөөд ээлжийн амралтын хоногоо сунгуулахыг хүссэн боловч татгалзсан хариу сонсоод ажлаа орхисон байна. Засгийн газраас энэ хэрэг явдлыг бүр 1992 онд хэлэлцэж байсан боловч, сая л эцсийн шийдвэрт хүрч, ажлаас халж байгаа аж. Сонирхолтой нь Венкаиах Найду сайд уг асуудлыг 2007 онд хэлэлцэж байсан боловч тухайн үедээ зохих шийдвэрт хүрээгүй байна.
Энэ мэт сонирхолтой явдал Энэтхэгт түгээмэл тохиолддог бөгөөд салан тусгаарлагч террорист бүлэглэлийн толгойлогч Пареш Баруа гэхэд 1978 онд анх төмөр замын буудалд ачаа зөөгчөөр ажилд орж, жилийн дараа гэхэд Ассамыг чөлөөлөх нэгдсэн фронт нууц бүлэг зохион байгуулан ширэнгэд сууришиж байсан бол 29 жилийн дараа түүнийг ачаа зөөгчөөр ажилладаг гэдгийг тогтоож ажлаас нь халж байжээ.
Герман, АНУ зэрэг хөгжингүй орнуудад ч мөн энэ мэт хэрэг явдал тохиолддог. Германд гэхэд төрийн нэгэн албан хаагч 14 жилийн турш ажилдаа очоогүй мөртлөө 745 мянган еврогийн цалин хөлс авсан байдаг аж. Харин 24 жил амарсан Верма ямар хэмжээний цалин хөлстэй байсан нь тодорхойгүй байна.
