Хойд Солонгосчууд Дорнодод онгоцоор ирж үхэр аваад буцсан тухай мэдээлэл цахим ертөнцөд тархаад байна.

Тодруулбал, Ерөнхийлөгч Ц.Элбэгдорж 2013 оны аравдугаар сард Хойд Солонгост айлчлахдаа хоёр орны хамтын ажиллагааны хүрээнд хэд, хэдэн гэрээ хэлэлцээрийг хийсэн. Энэ үеэр Хойд Солонгосчууд Монголоос малын мах болон бусад түүхий эд авах саналтай байгаагаа хэлж, манайхаас үхэр, мал авч нутагшуулах талаар ярилцсан. Манай тал ч уг саналыг хүлээн авсан билээ.
Энэ дагуу тэд ирж өөрийн нутагт нутагшуулах малаа аваад буцсан гэх мэдээлэл цахим ертөнцөд байгаа юм. Энэ талаар Дорнодын нисэх онгоцны буудлын ажилтанаас тодруулахад “Онгоц оны өмнөхөн ирээд буцсан. Дорнодод буусан Хойд Солонгосын “Ilyushin Il-76” онгоц нь тусгай тээвэрлэгч онгоц бөгөөд 40 тоннын даацтай” гэх мэдээллийг өглөө. Мөн аймгийн удирдлагууд “Өнгөрөгч сарын 29-ны өдөр Дорнод аймгийн Чойбалсан хотод Хойд солонгосын ачаа тээврийн онгоц газардаж 90 гаруй тооны үхэр ачаад хөөрсөн” гэж мэдээлж байна. Тус онгоц 29-ны өдөр газардах талаар нутгийн удирдлагуудад урьдчилж огт мэдээлэл өгөөгүй гэж байна. Энэхүү үйл явдал болсоны дараа нутгийн удирдлагууд Тагнуул, Цагдаа гээд тодруулж болох бүх газрууд руу утас цохисон боловч “Дээрээс ийм зааварчилгаа өгсөн” гэсэн хариултаас өөр мэдээлэл авч чадаагүй байна. Харин ачиж явсан үхэрийн тооны хувьд орон нутгийн удирдлагууд 90 гаруй тооны нас бие гүйцсэн эр, эм  үхэр ачсан гэж байгаа бол, нутгийн иргэд 200 гаруй эр эм нийлсэн бяруу (1 настай) ачиж явсан гэж байгаа юм байна.

Б.Золбоо