Дүнжингарав шинийн наймны дотор болно
Жил бүрийн хавар ММСУХ-ны санал санаачлагын дагуу Засгийн газрын шийдвэрээр уламжлал болгон зохион байгуулагддаг хаврын бүсийн Дүнжингарав уралдаан ирэх 2015 оны хаврын тэргүүн сарын шинийн наймандаа багтаж болохоор болжээ. Энэ талаар ММСУХ-ны ерөнхий нарийн бичгийн дарга П.Сэргэлэнгээс тодруулахад "Холбооны зүгээс Дүнжингарав хаврын бүсийн уралдаанаа хонин жилийн хаврын тэргүүн сарын шинийн наймандаа багтааж хийхээр төлөвлөж байна. Удахгүй тэргүүлэгчдийн хурал болно. Тэрхүү хурлаараа бид хэлэлцээд Дүнжингарав уралдааны товийг эцэслэн гаргана. Манай зарим аймгуудын салбар холбоод Дүнжингаравын өмнө холбооны уралдаануудаа хийдэг уламжлалтай. Жишээ нь Сүхбаатар аймгийн Жавхлант шарга МСУХ-ныхон Дүнжингаравын өмнө Аймгийнхаа аварга хүлгийг шалгаруулах "Жавхлант шаргын хурд" уралдаанаа хийдэг. Сүүлийн үед ихэнд аймгууд холбооныхоо уралдааныг Дүнжингаравын сорилго болгож хийдэг болоод байгаа. Тэгэхээр салбар холбоодынхоо тэрхүү асуудлуудыг харгалзаж үзээд Дүнжингарав уралдааныхаа товийг тэргүүлэгчдийнхээ хурлаар гаргана" гэлээ.
Ямартаа ч хаврын бүсийн "Дүнжингарав 2015" уралдаан айлчлан ирж буй Хонин жилийн хаврын тэргүүн сарын эхээр /шинийн наймны дотор/ болох бололтой. Бид энэ талаар дахин мэдээлэх болно.
