Фэйсбүүк хуудсаар дотно танилцаж, улмаар зургаар нь сүрдүүлж охид, бүсгүйчүүдтэй бэлгийн харьцаанд ордог, зарим нэг иргэнээс мөнгө авдаг байсан этгээдийг ЦЕГ-ын Зохион байгуулалттай гэмт хэрэгтэй тэмцэх хэлтсээс саатуулсан талаар манай сайт мэдээлж байсан. Тодруулбал, орон нутагт амьдардаг өөрийнхөө нэрийг нууцалсан, зураггүй, мэдээллээ нуусан хаяг нээсэн этгээд бусадтай харьцаж, итгэлийг нь олж аван 1075 зургийг хууль бусаар цуглуулж нийтэд дэлгэнэ гэж айлгаж бэлгийн болон санхүүгийн дарамт үзүүлдэг байсан юм. Тэгвэл уг этгээдийг цагдаагийн байгууллагаас Эрүүгийн хуулийн тусгай ангийн 123 /садар самууныг сурталчилах/, 149 /бусдын эд хөрөнгийг авахаар далайлган сүрдүүлэх/ дүгээр зүйл ангиар эрүүгийн хэрэг үүсгэн мөрдөн байцаалтын ажиллагаа явуулж байна. Уг этгээд “16 настай” хүүхэд байсан талаар ЦЕГ-аас мэдээлж байна. 

Манай улсын 7000 гаруй фээсбүүк хэрэглэгчийн олонх нь өсвөр насны хүүхдүүд, залуучууд байдаг тухай судалгаа бий. Өсвөр насны охидыг модель болгоно, клипэнд тоглуулна гэж хууран хувийн мэдээллийг авч, бэлгийн дарамтад оруулсан хэрэг ч бүртгэгджээ. Гэмт хэргийн хохирогчдын дунд охид, эмэгтэйчүүдээс гадна хөвгүүд хүртэл байгаа аж. Фэйсбүүк ашиглан гэмт хэрэг үйлдсэн этгээдүүдийн хоёр нь Монгол Улсын иргэн байгаа бол бусад нь гадаад улсын иргэн байгаа гэнэ. Иймд фэйсбүүкийн хэрэглэгчид үл таних этгээд, ялангуяа гадаад иргэний найзын хүсэлтийг хүлээн авч, танилцан хувийн мэдээллээ солилцохгүй байх хэрэгтэй юм. Цахим гэмт хэрэг үйлдэгчид өөрийн нэр, зургийг худал мэдээлдэг. Тэгэхээр танихгүй эзэнтэй фэйсбүүкийн цаана ямар зорилготой, хэн байгааг мэдэх боломжгүй юм.

Б.Золбоо