ОХУ-ын Ерөнхийлөгч Владимир Путин Узбекистанд албан ёсны айлчлал хийхээр хүрэлцэн очжээ. Тэрээр тус улсын Ерөнхийлөгч Ислам Каримовтой хэлэлцээр хийх явцдаа узбекийн хөдөө аж ахуйн  бүтээгдхүүнүүдийг Орост нийлүүлэх явдлыг нэмэгдүүлэх хэтийн төлөвлөгөөний талаар ярилцах аж.

“АНУ болон ЕХ-ны зүгээс тавьсан хориг арга хэмжээтэй холбоотойгоор Узбекистанаас хөдөө аж ахуйн бүтээгдхүүн нийлүүлэлтийг өргөжүүлэх асуудал яригдах нь мэдээж” хэмээн Оросын Ерөнхийлөгчийн туслах Юрий Ушаков сэтгүүлчдэд мэдэгдсэн байна.  

Энэ талын асуудал сүүлийн хэдэн сарын турш яригдаж байгаа бөгөөд өнгөрөгч есдүгээр сард хоёр улсын компаниудын түвшинд хэлцэл явагдан, 11-р сарын сүүлчээр Узбекистанд жимс ногоо боловсруулах үйлдвэр байгуулах хамтарсан төслийг хэрэгжүүлэх, бүтээгдхүүнийг нь Орост нийлүүлэх талаар шийдвэр гаргасан билээ.

Мөн ОХУ-ын Ерөнхийлөгчийн айлчлалын үеэр Узбекистаны 890 сая ам.долларын өрийн асуудлыг шийдвэрлэх төлөвлөгөөтэй байгаа аж. “11-р сарын байдлаар өрийн нийт хэмжээ 890 орчим сая ам.доллар болсон бөгөөд үүний 500 сая нь үндсэн өр, 388 сая нь өрийн хүүд бодогдож байгаа” гэж Ушаков тайлбарлажээ. Түүний өгүүлснээр, өөрсдийн ерөнхийлөгчдийн даалгавраар хоёр орны сангийн яамд зөвлөлдөх уулзалт хийсэн бөгөөд өрийн асуудлыг шийдвэрлэхтэй холбоотой хэлэлцээрийн төслийг бэлтгэсэн аж.

“Айлчлалын явцад хоёр орны хоорондох санхүүгийн асуудал сайнаар шийдэгдвэл худалдаа-эдийн засгийн хамтын ажиллагааны хөгжилд саад болж байсан нөхцөл байдал алга болох юм” хэмээн Ушаков онцлон тэмдэглэжээ.

ОХУ-ын Ерөнхийлөгчийн туслахын хийсэн мэдээллээс харахад, айлчлалын явцад дөрвөн чухал баримтад гарын үсэг зурагдах юм байна. Үүнд: Санхүүгийн шаардлага, хариуцлагыг харилцан зохицуулах тухай улс хоорондын хэлцэл, 2015-2019 онд Орос-Узбекистаны хоорондох эдийн засгийн хамтын ажиллагааг гүнзгийрүүлэн хөгжүүлэх үндсэн чиглэлүүдийн тухай хэлэлцээр, Хууль бус замаар хураагдсан мансууруулах болон сэтгэцэд нөлөөлөх бодис бэлдмэлүүдийн судалгааны үр дүнг харилцан солилцох тухай протокол, мөн Орос, Узбекистаны Гадаад хэргийн яамд 2015 онд хамтран ажиллах хөтөлбөр зэрэг баримт бичгүүд багтаж байгаа аж.