БНСУ-ын Чежү арал руу өнгөрсөн дөрөвдүгээр сарын 16-нд аялж байсан “Sewol” усан онгоц живж, олон зуун сурагч, энгийн иргэд амиа алдсан харамсалтай хэрэг гарсан. Тухайн үед усан онгоцонд байсан 476 хүнээс 172-ыг нь аварч чадсан юм. 

Тэгвэл Өмнөд Солонгосын Куанжу хотын шүүхээс “Sewol” хөлөг онгоцыг эзэмшигч  “Чонхэжин Марин” компанийн гүйцэтгэх захирал Ким Хан Сикт 10 жилийн хорих ял оноосон байна.

Шүүхээс түүнд  ийм ял оноох болсон шалтгаан нь тухайн үед “Sewol” хөлгийг далайд гарах үед даац хэтрүүлэн ачаа тээвэрлэх зөвшөөрөл олгосон, хэргийн газраас зугтсан, “Чонхэжин Марин” компаниас 2.6 сая ам.доллар завшсан гэх асуудалд буруутгаж байгаа аж.

Ким Хан Сикийг өнгөрсөн тавдугаар сард Бусан хотын нэгэн сүмээс баривчилсан юм. Түүнчлэн өнөөдрийг хүртэл түүний эхнэр, хүүхэд болон хамсаатнуудыг хайсаар байгаа юм.

Эргэн сануулхад “Sewol” хөлөг осолдсны дараа “Чонхэжин Марин” компанийн ерөнхийлөгч Ю Бён-Ун сураггүй алга болсон ба түүний цогцсыг өнгөрсөн зургаадугаар сарын 22-нд олсон. Мөн өнгөрсөн сарын эхээр ерөнхийлөгчийн том хүү Ю Дэ Гюн гэгчийг 15 жилийн ялаар шийтгэсэн юм. Тэрбээр “Чонхэжин Марин” компанийн ерөнхийлөгчийн хүү гэх шалтгаанаар байгууллагаасаа 10 тэрбум воныг завшсан аж. Мөн энэ сарын эхээр хөлгийн ахмад Ли Жүн Сёкийг 36 жилийн хорих ялаар шийтгэж, багийн 15 гишүүнд 10-25 жилийн хорих ял оноосон билээ.