БНАСАУ-ын эрх баригчид нэг улсын дотор төрийн хоёр байгуулал зэрэгцэн орших буюу холбоот улс байх томьёоллоор хоёр Солонгосыг нэгтгэх саналтай байгааг Умард Солонгосын Гадаад хэргийн сайд Ли Сун Ён НҮБ-ын 69 дэх удаагийн чуулганы хүрээнд бямба гарагт болсон улс төрийн ерөнхий хэлэлцүүлэгт үг хэлэхдээ мэдэгджээ. Үүний дараа түүнийг НҮБ-ын Ерөнхий нарийн бичгийн дарга Бан Ги Мүн хүлээн авч уулзсан байна. “Хоёр Солонгосын нэгдэл нь улс төрийн өөр өөр тогтолцооны сөргөлдөөний замаар бус харин нэг улсын дотор төрийн хоёр байгуулал зэрэгцэн орших буюу холбоот улс байх томьёоллоор нэгтгэх ёстой гэж БНАСАУ үзэж байна. Энэ бол дайнаас зайлсхийх, мөн энх тайвны баталгаа болох цорын ганц арга юм” гэж НҮБ-ын Ерөнхий Ассемблейн индэрээс анх удаа үг хэлж буй Ли Су Ён хэлжээ.Үүнээс гадна, БНАСАУ-ын “тусгаар тогтнол болон оршин байх эрхэд аюул занал учруулж” мөн “шахаж хавчих бодлого” явуулж байна гэж Умард Солонгосын Гадаад хэргийн сайд АНУ-ыг буруушаасан байна. Хэрэв Вашингтон Умард Солонгосын талаар явуулж буй бодлогоо өөрчилбөл Солонгосын хойгийн цөмийн асуудлыг зохицуулж болно гэж тэрбээр үзэж байгаа аж.
