Энэ оны гуравдугаар сард малайзын Куала Лампур хотоос Бээжинг чиглэн ниссэн Малайзын иргэний агаарын тээврийн 370 нислэгийн дугаартай Боинг 777 онгоц ор сураггүй алга болсонд тооцогдох болсон билээ.

Онгоцонд 227 зорчигч, нисэх багийн 12 гишүүн зорчиж явсан юм. Гэтэл уг эмгэнэлт явдлаар далимдуулан хохирогчдын данснаас их хэмжээний мөнгө хулгайлж байсан хэрэгтнүүдийг өчигдөр цагдаагийн газар барьж саатуулжээ.

Тодруулбал, энэ оны гуравдугаар сарын 8-ны өдөр ор сураггүй алга болсон онгоцонд зорчиж явсан хоёр хятад, нэг малайз, онгоцны багийн нэг гишүүний нийт дөрвөн зорчигчийн банкны данснаас HSBC банкны ажилтан хууль бусаар мөнгө авч байсан нь илэрчээ. Цагдаагийн газар уг банкны ажилтанг нөхрийнх нь хамт саатуулаад байгаа юм байна.

Түүнчлэн нэг пакистан хүнийг энэ хэрэгт сэжиглэж, эрэн сурвалжилж байгаа гэнэ. Хэрэгтнүүд хохирогчдын данснаас нийт 35 мянган ам.долларыг завшсан бөгөөд интернэт банкаар дамжуулан өөр банк руу шилжүүлж байсан нь мөрдөн шалгалтын явцад тодорхой болсон аж.

HSBC банкны төлөөлөгч CNN-д хандан ийм жигшүүрт хэрэг гарсанд харамсч байгаагаа илэрхийлж, хохирогчдын ар гэрийнхнээс уучлалт гуйсан бөгөөд дахин ийм зүйл давтагдахгүй хэмээжээ.

Б.Даваа