Бүх амьдралынхаа туршид үгээгүй ядуу амьдраад мөнгө хуримтлуулах ямар хэрэгтэй юм бэ? Курт Дегерман их томоотой, чадварлаг хүүхэд байжээ. Тэрбээр сургуульдаа онц сурч, бусад хүүхдүүдэд үлгэр дууриал болж байсан гэдэг. Багш нар нь ч түүнийг сайхан ирээдүй хүлээж байгаа хэмээн өгүүлдэг байв. Гэтэл тодорхойгүй учир шалтгаанаар Дегерман гоё сайхан ирээдүйтэй байж чадсангүй. Харин ч нас ахих тусам улам доошоо унаж байжээ. Мань хүн гуйлгачин болтлоо дор орсон байна. Гуйлга гуйн, хаа тааралдсан газраа унтаж, хогийн цэг дээрээс хаягдал хоол олж иднэ.

Дегерманд орон сууц байсан ч мань эр түүнийгээ хогийн сав болгож орхижээ. Гэрээс нь заваан үнэр байнга ханхалж байсан тул хөршүүд нь тэсэлгүй гомдол гаргасан байна. Дуудлагаар ирсэн нийгмийн ажилтнууд хөглөрсөн хог, бохир заваан эд зүйл, хоолны үлдэгдэл дотор өөд болсон эзнийг нь олоод зогсохгүй ойролцоогоор 1.5 сая доллараар үнэлэгдэх 430 ширхэг алтан гулдмайг олжээ. Талийгаач өөрийг нь үе үе эргэж тойрдог байсан зээ дүүдээ энэ бүгдийг гэрээслэж үлдээсэн байлаа.

Дегерман согтууруулах ундаа, хар тамхинд толгойгоо мэдүүлсэн ч ухаан бодлоо ажиллуулдаг байсан бололтой. Сургуульд онц суралцаж байсны үр дүн ч гарчээ. Мань хүн өдөр тутмын хэвлэлийг тогтмол уншиж, өндөр хөгжилтэй, баян компаниудын үйл ажиллагааг анхааралтай ажигладаг байв. 30 жилийн туршид үгээгүй ядуу саятан эр шил, лааз цуглуулан олсон мөнгөө Швед Улсын хамгийн амжилттай яваа компаниудын хувьцаа болгодог байсан гэнэ. Харин хүртсэн ногдол ашгаа алтан гулдмай болгож байжээ. Эх сурвалж www.wikimon.mn