1000 оюутан Туул голын эрэг дагуух хог хаягдлыг цэвэрлэж байна

Иргэн, аж ахуйн нэгж, улс орон эдийн засгийн асуудлаа шийдвэрлэх цорын ганц гарц нь хөдөлмөрлөх, бүтээх явдал юм. Хөдөлмөрийн яамнаас Үндэсний мэргэжилтэй ажилтан бэлтгэх хөтөлбөрийг хоёрдох жилдээ хэрэгжүүлж байгаа. Энэхүү арга хэмжээний хүрээнд “Баялагийг бид бүтээнэ” уриан дор Улаанбаатар хотод байрлах МСҮТ-ийн “Үндэсний мэрэгжилтэй ажилтан бэлтгэх  хөтөлбөр”-т хамрагдсан оюутнуудын санаачилгаар 1000 оюутныг хамруулсан Туул голын ойр орчмын бохирдол ихтэй газруудыг цэвэрлэх их цэвэрлэгээний ажлыг өнөөдөр зохион байгуулж байна.

Тус арга хэмжээний нээлтэд БОНХ-ийн сайд С.Оюун тэргүүтэй албаны хүмүүс оролцож цэвэрлэгээнд оролцож байгаа оюутнуудтай дурсгалын зураг татууллаа. Өнөөдрийн үйл ажиллагааны  талаар БОНХ-ийн сайд С.Оюун хэлэхдээ “Цэвэрлэгээний ажил бол албан шаардлагын ажил биш, иргэд сайн дурын үндсэн дээрээ хийх ёстой тийм ажил. Хамгийн эхний ээлжинд иргэд маань хогоо хаяхгүй байх хэрэгтэй. Харамсалтай Туул голын сав дагуу иргэд аялж зугаалах явцтаа маш их хэмжээний хог хаядаг. Өнгөрсөн онд Туул голын сав газрын захиргааг шинээр байгуулсан. Энэ маань Туул гол эзэнтэй болж байна гэсэн үг.   Хөдөлмөрийн яам МСҮТ-үүдтэй хамтраад өнөөдөр маш сайхан арга хэмжээг зохион байгуулж байна. 1000 гаруй үндэсний мэргэжилтэй залуучууд Туул голын эрэг дагуу цэвэрлэгээнд маш идэвхтэйгээр оролцож байгаад сэтгэл хангалуун байна. Ямар ч байсан өнөөдөр цэвэрлэгээ хийсэн залуучууд дахиж ирэхдээ хогоо хаяхгүй байх.  Энд нэгэн зүйлийг нийслэлчүүддээ уриалахад бүгдээрээ салхинд гарахдаа уутанд хогоо цуглуулаад явдаг байя гэж хэлмээр байна. Нөгөөтэйгүүр бидний эрүүл мэнд орчны бохирдол гэдэг зүйлээс шууд хамаарч байгаа өнөө цагт өөрсдийнхөө болон хүүхэд багачуудынхаа эрүүл мэндийг бодоод энэ хавар бүгдээрээ цэвэрлэгээгээ хийж, мод ургамлаа тарьцгаая гэж давхар уриалах байна” гэв.

Цэвэрлэгээг Туул голын эрэг дагуу нийт 16 км газарт буюу Баянзүрхийн гүүрнээс Яармагийн гүүр хүртэл гол дагуу явуулж байна. Мөн цэвэрлэсэн хог хаягдлыг шуудайлж бөөгнөрүүлэн Баянзүрх, Хан-Уул дүүргүүдийн ТҮК-ийн машинаар шууд ачуулах аж. Энэхүү арга хэмжээг Хөдөлмөрийн яам, Байгаль орчин ногоон хөгжлийн яам,  Туул голын сав захиргаа, Нийслэлийн хөдөлмөрийн газар, Баянзүрх, Хан Уул дүүргүүдийн тохижилт үйлчилгээний газруудтай хамтран зохион байгуулж байгаа юм байна.