Сүүлийн жилүүдэд Өмнөд Солонгосын нийгэмд, мөн гэр бүлд хүчирхийлэл, гэмт хэрэг гарах нь ихэсч байгаатай холбоотойгоор тус улсын эрх баригчид “Гадаадын иргэдтэй гэр бүл болох тухай” хуулиндаа өөрчлөлт оруулжээ. Энэ хууль 2014 оны 4-р сарын 1-нээс хэрэгжиж эхэлнэ.

Хуульд зааснаар солонгос иргэнтэй гэр бүл болох хүмүүс заавал солонгос хэл мэдэх шаардлагатай 1-р түвшний шалгалт өгч байж гэр бүл болох зөвшөөрөл авах аж. Гэр бүлийн хүчирхийлэл ихэнхдээ хэл мэдэхгүйгээс үүдэлтэй гэж үзжээ.

Гэхдээ Өмнөд Солонгост нэг жил амьдарсан, эсвэл солонгос хэлтэй холбоотой боловсрол эзэмшсэн бол шалгалтаас чөлөөлнө. Түүнчлэн солонгос иргэний хүүхдийг төрүүлсэн бол шалгалт өгөхгүй гэнэ.

Өмнөд Солонгос мөн гадаадынхантай гэрлэх хүсэлтэй өөрийн иргэдэд тавих шаардлагаа өндөрсгөжээ. Гадаадын иргэнтэй гэрлэх солонгос хүний жилийн орлого 14 мянган доллараас багагүй байна.

Энэ нь 2 хүнтэй гэр бүлд хамаатай, харин тухайн гэр бүл 3 гишүүнтэй бол 19 мянган доллар гэх зэргээр нэмэгдэх ажээ.