Зургадугаар сараас эхлэн Улаанбаатар-Парис чиглэлд шууд нислэг үйлдэх болсон. Үүнтэй холбогдуулан Франц улсаас Монгол Улсад суугаа Онц бөгөөд бүрэн эрхт элчин сайд Ив Дэлунэ мэдээлэл өглөө. Тэрээр “Шууд нислэг үйлдэх болсон нь хоёр орны харилцаанд нэгэн шинэ холбоос боллоо. Франц улс дэлхийн хүн бүрийн очих дуртай аялал жуулчлалын томоохон бүс нутаг яах аргагүй мөн.

  Монгол орны хувьд улс төр, нийгэм эдийн засаг, аялал жуулчлал, соёлын харилцааг дээд төвшинд эрчимжүүлэхэд маш чухал алхам боллоо. 2013 онд Франц улсаас Монгол Улсад 10 мянган жуулчин ирсэн. Энэ тоогоороо баруун Европоос монголд жуулчилсан хүмүүсийн тоогоор тэргүүлж байгаа” гэдгийг хэллээ. Шууд нислэг үйлдэж байгаатай холбоотой визний журмандаа зарим нэг өөрчлөлт оруулсан гэдгийг ч хэллээ.

 Тэрээр “Виз авах нөхцөл нь хэвээрээ. Харин Парис руу шууд нислэгтэй холбоотой визний бичиг материал хүлээж авснаас хойш хурдан хугацаанд хариу өгөх болно” гэдгийг хэллээ. Мөн гуравдугаар сарын 1-нээс эхлэн дипломат пасторттой иргэд Франц улсад визгүй зорчихоор болжээ. Улаанбаатар-Парисын чиглэлд зургадугаар сараас эхлэн долоо хоногийн Даваа, Баасан гаригт шууд нислэг үйлдэх юм байна.

Б.Нандиа