Намрын налгархан үдшээр дуу хуурынхаа өргөөнд урьсан “Чукагийн гудамж”-нд зочлогсдын ихэнх нь 30-аас дээш насныхан байлаа. Эхнэрээ, ээжийгээ, хүүхдээ дагуулан ирсэн үзэгчид түүний хэлсэнчлэн зөвхөн жааз, зөвхөн поп дуунуудыг л эндээс сонсохыг хүссэн байх л даа. Тиймдээ ч тэд хоёр өдрийн турш “Чукагийн гудамж”-наас” салаагүй биз.
Нүд гялбасан гэрэл, нүргээнт хөгжмөөс тэс өөр, тийм гэхийн аргагүй, ёстой л жааз, поп аялгуунд тохирсон орчин. Үзэгчид пиг дүүрэн. Чука улсын циркийн байрыг сонгож тоглолтоо хийсэн нь ч оножээ. Түүнийг бас түүний тоглолтод уригдсан дуучдыг хаанаас нь ч харж болно. Энгийн хэрнээ, эгэлгүй тансаг аялгуу эгшиглэсэн “My street”. Он жил улиравч шив шинэхэн мэт сэтгэл хөдөлгөсөн дуунууд. Орчлон дундуур урсан одсон дурсамж.
...Хүлээсэн хүсэн учрал, хүссэн мөч ирлээ. Хар цамц, саарал костюмаар гангарсан Чукаг үзэгчид алга ташин угтсан.
“Миний гитарын аялгууг таньж
байна уу
Миний дуулахыг найзууд минь
санаж байна уу
Бидний дуулах дуртай дуунд
бүгд сэрж
Энэ л цонхнууд гэрэлтдэг байсныг” хэмээн дуулахад нь үзэгчид суудлаасаа босон хүндэтгэл үзүүлж дагаж дуулсан. Тэрбээр энэ дуугаа “Бага тойруу”-гийнхандаа зориулна лээ. Бас тэдний дуулахыг сонсч, баясч, тэдэн шиг дуулахыг хүсч явсан дөчин настнууд энэ үдэш 18 насандаа эргэн очиж, магадгүй зарим нь сэтгэлдээ Чукатай хамт, Чукагийн гудамжинд насан багынхаа андуудыг зүрхнийхээ цаанаас хайн, дуулсан биз ээ.
“Хайрын сэтгэл чамдаа шүү, чамдаа
Хайрт минь чи итгээрэй...”
Дэндүү гайхалтай дуу. Дахин дахин дуулуулаад л баймаар.
Монгол Улсын гавьяат жүжигчин Б.Сарантуяа, Т.Ариунаа, “Харанга”, “Чингис хаан”, “Номинталст” хамтлаг гээд рок, попынхон бүгд л “Чукагийн гудамж”-нд ирсэн байлаа. Чука бусад шиг тоглолтынхоо үеэр хэд хэдэн хувцас сольж загвар үзүүлсэнгүй ээ. Үнэндээ түүнд охид хүүхнүүд шиг дэгжирхэх явдал зохих ч үгүй. Үзэгчид түүний хэрхэн гангалахыг бус түүнээс уянгалаг хоолой, тансаг эгшгийг л хүсдэг.
Түүний тоглолтын нэгээхэн хэсгийг “Харанга” эзэгнэсэн. Эзэгнэхгүй байх ч учиргүй. Тайзан дээрээс үе үеийнхээ ХИТ болсон дуугаар үзэгчдэдээ бэлэг барих “Харанга”-ынхан Чукагийн нэг хэсэг гэдгийг хүмүүс ойлгосон байх.
“Сэм сэмхэн сэтгэл үгүйлж дуулан хүлээнэ
Сэрүүхэн намрын үдэш зүүдлэн хүлээнэ
Зөөлөн бороо сэтгэлд шивэрсэн ч чи ирээгүй
Зүрхээ аргадан дуулан хүлээсэн ч чи ирээгүй” хэмээн дуулахад нь үзэгчид түрлэг нэмэх нь дэндүү гоё. Ийм тоглолтыг дэндүү удаан хүлээжээ, бид. Яг тэр шөнө дуун бороонд “Чука гудамж”-нд зочлогсод нэвт норсон байж таараа. Гэхдээ энэ их баяр хөөр, хүлээлт дунд нэг хоолой үгүйлэгдээд байсан. Тиймээ, Тэр бол “Харанга”-ын Х.Лхагвасүрэн байлаа. Түүний донжтой дуулах төрх, хэн ч түүн шиг дуулж чадахгүй хоолой үнэхээр үгүйлэгдэж байсныг хэлмээр байна. Хэрэв тэр “My street”-д зочилсон бол түүний уянгалаг атлаа хүчтэй дуунуудад нь үзэгчид согтох байлаа. Мэдээж, Лхагваагаа орлон дуулах Чука, Энхманлай нарын сэтгэлд үл мэдэгхэн гуниг хурсан байна лээ.
“Толин хул”, “Москвагийн бороо”, “Зүрх”, “Хар нүдэн”, “Зуун зуун жил чамайгаа хайрламаар байна” гээд л...
Үзэгчдийн зүрх сэтгэлийг байлдан дагуулсан үе үеийн шилдэг дуунуудаа толилуулах “Харанга”-ынхан үзэгчдийг дуулуулж, уйлуулж чадсан байх.
“Уучил намайг, чиний сэтгэл
Хавар нь бус намар нь байж дээ
Алаг цэцэгсийн хүрээлэнд дунд
Амраг минь чи байж дээ” гэх ч юмуу,
“Зуун зуун жил зөвхөн чамайг хайрламаар байна
Зуун зуун жил зөвхөн чамтай амьдармаар байна” хэмээн дуулах түүний дуу тэр үдшийн сайхан мөчүүдийн нэг байлаа.
Энэ тоглолтын хамгийн том сюрприз бол Чука хэн нэгэнтэй хамтран дуэт дуулах явдал хэмээн өмнө нь ярьж байсан. Тэр хэнтэй дуулсан гээч. Т.Ариунаатай. “Зүүд” хэмээх тэдний шинэ дуу үзэгчдэд хүрч чадсан нь илт. Тиймдээ ч үзэгчид удаан алга ташсан. Үнэхээр гоё дуу, үг нь бас аялгуу нь. Тэдний хоолой гайхалтай зохицож байна шүү гэх үгс чих шүргэсэн юм.
Тэр үдэш “Миний гудамж”-нд зөвхөн жааз, рок дуу эгшиглэх болно” гэсэн мөрөөдлөө Чука гүйцээсэн. Ямар ч байсан “My street”-ээс үзэгчид жинхэнэ оюуны таашаал авч чадсан гэдэгт итгэнэ. Цахилгаан хэдэн минут тасарсныг эс тооцвол “Чукагийн гудамж”-наас салмааргүй л байлаа.
Ж.ЭРХЭС
- Холбоотой бичлэг :
- http://www.mglclub.com/776440/dda/trackback
