Ердөө хэдхэн хоногийн өмнө Азийн аварга болж, өнгөрсөн амралтын өдрүүдэд Азербайжаны нийслэлд болсон “Их дуулга”-ын тэмцээнд алтан медаль хүртэн, 66 кг-ын жинд дэлхийн чансааг тэргүүлэх болсон ОУХМ Д.Төмөрхүлэгийг гаднынхан хэдийнэ сонирхоод эхэлжээ. Жүдо бөхийн хувцас хэрэгслийн үйлдвэрлэл хийгээд олимп, дэлхийн аваргын тэмцээний үеэр хийдэг баримтат кино, цуврал нэвтрүүлгээрээ дэлхийд алдартай “Fighting Films” компани манай тамирчныг нүүр царайгаараа сонгосон нь үүний илрэл юм.

Олон улсын жүдо бөхийн холбоо (IJF)-той албан ёсны эрхтэйгээр хамтран ажилладаг тус компани Д.Төмөрхүлэгтэй дөрвөн жилийн гэрээ хийсэн байна. Ингэснээр тэд дөрвөн жилийн турш манай тамирчныг өмсгөлөөр хангахаас гадна оролцсон тэмцээн уралдааных нь тухай баримтат кино, нэвтрүүлэг хийх аж. Дэлхийд алдартай компанийн нүүр царай болж, тэр дундаа 30 гаруй жилийн түүхтэй Английн компанитай хамтран ажиллах хоёр дахь монгол хүн нь ийнхүү Д.Төмөрхүлэг болов.