Улсынхаа үүсэн байгуулагдсаны 60 жилийн ойд зориулсан баярын парадад БНАСАУ-ын удирдагч Ким Чен Ир оролцсонгүй гэж “Новости” Пхеньян дахь эх сурвалжаас иш татан мэдээлэв. Эл мэдээллийг Франс пресс агентлаг ч нотолжээ.

Ким Чен Ир сүүлийн 20 гаруй хоног олон нийтийн дунд үзэгдэхгүй байгаа нь түүний эрүүл мэндийн байдал дордсонтой холбоотой юм биш үү гэсэн таамаглалыг сэтгүүлчид дэвшүүлж буй. Эл таамаглал 60 жилийн ойн баяр ёслолын үеэр нэг бол батлагдана, үгүй бол няцаагдана гэж дэлхийн хэвлэл, мэдээллийн хэрэгслүүд дамжуулж буйг “Өнөөдөр” өмнө уламжилсан билээ.

Ийм арга хэмжээнд төрийн тэргүүн нь үл оролцох нь маш чухал шалтгаантай байж таарна гэж ажиглагчид тэмдэглэж байна. “Нью-Йорк таймс”-т бичсэнээр, чихрийн шижин, зүрхний өвчтэй Ким Чен Ирийн бие наймдугаар сарын 22-нд муудсан болохыг Бээжинд суугаа БНСУ-ын нэрээ нууцалсан нэгэн дипломатчаас иш татан Өмнөд Солонгосын хэвлэлүүдэд мэдээлжээ. Чухам тэр өдрөөс хойш Хойд Солонгосын лидерийн эрүүл мэнд тун базаахгүй байгаа гэнэ. Хятадаас Пхеньянд таван эмч очсон тухай ч эх сурвалжууд мэдээлж амжсан юм.

Ким Чен Ирийн амь дээсэн дөрөөн дээр байгаа тухай АНУ-ын тагнуулын байгууллага өчигдөр мэдэгдлээ. АР мэдээлснээр, Хойд Солонгосын удирдагчийн тархинд цус харвасныг харуулах мэдээллийг тусгай албадын шугамаар авсан хэмээн тус байгууллагын албан ёсны төлөөлөгч хэлсэн ч дэлгэрэнгүй тайлбар өгөхөөс цааргалжээ.

Хойд Солонгосын талаар судалдаг Японы шинжээч, профессор Тошимицу Шигемура саяхан хэвлүүлсэн номондоо Ким Чен Ирийг бүр 2003 оны намар өөд болсон гэж нотолжээ. Түүнийг тэр цагаас өдийг хүртэл орлон тоглогчдоор орлуулж буй хэмээн япон эрдэмтэн үзсэн байна. БНСУ-ын Засгийн газрын албаны хүн Ёнхап агентлагт өгсөн ярилцлагадаа “Ким Чен Ир эрүүл мэндийн асуудалтай буй нь бараг илэрхий боллоо” гэж өгүүлжээ. Гэхдээ хараахан амьсгал хураачихаагүй байгаа гэж уг албаны хүн нотолсон аж.

Тэгвэл Пхеньянд энэ бүх мэдээллийг ямар ч үндэслэлгүй, Өрнөдийн хэвлэл мэдээллийнхний хуйвалдаан хэмээн үзэж байгаа гэнэ. Ким Чен Ир хүндээр өвчилсөн гэх яриаг Хойд Солонгосын дипломатч лхагва гаригт няцаалаа. Японтой тогтоосон харилцааны асуудал эрхэлдэг Сон Ир Хо хэмээх уг дипломат ажилтан “Энэ бүх нийтлэлийн зорилго нь үнэний үнэргүй мэдээлэлд олон нийтийг итгүүлэхэд оршиж байгаа гэдэгт итгэлтэй байна. Өрнөдийнхөн өмнө нь ч худал яриа тарааж байсан шүү дээ” хэмээн Японы “Киодо” агентлагт мэдэгджээ. Ким Чен Ирийн эрүүл мэндийн талаар сүүлийн өдрүүдэд дэвшүүлсэн янз бүрийн таамаглалд Хойд Солонгосын тал албан ёсоор анх удаа няцаалт өгч буй нь энэ аж.

Цөмийн хөтөлбөрийг нь зогсоох асуудлаар олон улсад тавьж буй хүчин чармайлт сүүлийн үед бэрхшээлтэй тулгараад байгаа. Хэрэв 66 настай Ким авгайн бие чилээрхүү буй нь үнэн бол дээрх асуудал улам л хүндрэлтэй тулгарна гэж Өрнөдөд үзэж байна.

Пхеньяны төв талбайд мягмар гаригт болсон баярын парадыг телевизээр үзүүлсэн бөгөөд БНАСАУ-ын дээрээсээ хоёр дахь хүн Ким Ён Нам тэргүүтэй лидерүүд байлцжээ. Тус улсын төрийн хэвлэл мэдээллийн хэрэгсэл Ким Чен Ир байхгүй буй талаар үг дуугараагүй гэнэ.

Ким дарга таалал төгслөө гэхэд Хойд Солонгосын хямрал эцэслэхгүй гэж зарим ажиглагч үзэж байна. Түүний эзгүйд Хойд Солонгос цөмийн асуудлаарх хэлэлцээнд баримтлах стратегиа өөрчлөхгүй байх магадлалтай гэнэ. “Ким Чен Ирийг залгах ямарваа хамтын удирдлага түүний бодлогыг үргэлжлүүлж, цөмийн зэвсгээ бүрмөсөн устгаагүй хэрнээ мөнгө, газрын тос, бордоо гээд боломжит бүхий л хэлбэрээр Өрнөдөөс ашиг унагахыг оролдоно” гэж шинжээчдийн нэг нь хэллээ. Ер нь ч Кимийн бие тааруугаас Хойд Солонгосын цөмийн хөтөлбөрийг зогсоох зургаан талт хэлэлцээ олигтой ахицгүй буй гэж Вашингтонд албаны зарим хүн хувийнхаа бодлыг хуваалцсан байна.

Хоёр удаа гэрлэсэн гэх Ким Чен Ир гурван хүүтэй гэдэг. Гэвч тэдэн дотроосоо өөрийгөө залгамжлуулахаар хэн нэгийг нь зориуд сонгон бэлтгээгүй аж. Өөрийн эцэг Ким Ир Сенийг таалал төгссөний дараа төрийн жолоог залгамжлан аваад Ким Чен Ир тасралтгүй 14 жил эрх барьж байгаа юм.

Х.Энх