ЭРЭГТЭЙ
60 кг: “Лондон-2012”-ын циклд олимпийн эрхийн бүст багтаж байсан ОУХМ Ганбатын Болдбаатар Дюссельдорфийн гранпригээс гурав дахь медалиа авлаа. Тэрбээр 2010 онд тавд орж байсан бол 2011 онд хүрэл, 2012 онд мөнгөн медаль авсан. Тэгвэл өнөө жил амжилтаа ахиулж, Германы дэвжээнд төрийн дууллаа эгшиглүүллээ. Болдбаатар энэ тэмцээнд таван барилдаан хийж түрүүлсэн бөгөөд эхлээд Тунисын Ф.Доубиг минут хүрэхгүй хугацааны дотор цэвэр савав. Дараа нь Голландын М.Салминен, Францын И.Ноур нарыг мөн л иппон буулгажээ. Г.Болдбаатар өмнө нь франц жүдочтой гурав барилдаж, бүгдэд нь ялж байв. Болдоо хагас шигшээд Их дуулгын хоёр түрүүт Гүржийн А.Папинашвилитэй таарч, бас нэгэн цэвэр ялалт байгууллаа.
Болдбаатар 2010 онд Венагийн Дэлхийн цомд түүнд ялагдаад дараа жил нь Абу Дабигийн гранприд даагаа нэхэж байв. Харин энэ удаа хайнаа хагалах барилдаанд илүүрхсэнээр хоёр жил дараалан Дюссельдорфийн гранпригийн аваргын төлөө барилдахаар боллоо. Харин финалд Бразилийн залуу жүдоч Д.Сантостай хүч үзэж хэн хэн нь үнэлгээ салгаж чадаагүй бөгөөд шүүгчийн саналаар манай бөх илүүрхсэн байна. Түүний амьдай Чимэд-Ёндонгийн Болдбаатар энэ жинд Японы И.Хиронориг ялж, гараагаа сайхан эхэлсэн ч дараа нь Чехийн П.Петриковт вазаригаар ялагдчихав.
66 кг: С.Мияарагчаад медаль тун ойрхон байлаа. Манай бөх Беларусийн Д.Шершан, Кыргызстаны И.Баилинов, Испанийн С.Уриарте нарыг дараалан ялж, их шөвөгт үлдэв. Ялангуяа ДАШТий мөнгөн медальт Уриартег цэвэр савж, хүчтэй байгаагаа харуулсан. Гэвч мөнгөн медалийн төлөө Их дуулга, Гранпри тэмцээний таван алтан медальт Японы М.Фүкүокад иппоноор дийлдсэн байна. Улмаар хүрэл медалийн төлөө Израилийн залуу бөх Г.Поллакт вазаригаар хожигдож, тавдугаар байр эзэлжээ. Мияарагчаа 2011 онд Чиндаогийн Гранпри тэмцээний 1/16 шатанд хожиж байв. Энэ жинд зодоглосон Д.Алтансүх Румыний Р.Лазеаг вазари, Испанийн А.Родригесийг цэвэр ялаад япон бөх, 2011 оны дэлхийн аварга, Лондоны олимпийн хүрэл медальт М.Эбинумад иппон буусан байна.
73 кг: Энэ жинд зодоглосон хоёр залуу бөх маань эхний даваандаа дийлдэн тэмцээнээ өндөрлүүллээ. Ц.Нарантогтох Украины А.Тищенкод иппон, Н.Хадбаатар Казахстаны Э.Зарипкановт вазаригаар дийлджээ.
ЭМЭГТЭЙ
48 кг: Энэ жил анх удаа улсын аварга болсон Г.Отгонцэцэг Японы залуу жүдоч Р.Окамотод цэвэр ялагдав.
52 кг: А.Цолмон Унгарын Б.Марошыг цэвэр саваад Японы Н.Танимотод дийлджээ. Түүнчлэн Б.Бат-Эрдэнэ Венесуэлийн тамирчныг түвэггүйхэн ялаад тус тэмцээнд аваргалсан Косовогийн М.Келмендид хоёр юүкогоор дийлдэв.
57 кг: Д.Сумъяа өнгөрсөн жил тус тэмцээний эхний даваанд Голландын Ж.Франссентай тааран хожиж, цааш явсаар хүрэл медаль авч байв. Тэгвэл өнөө жүдочтойгоо дахин нэгийн даваанд учирч, иппон буужээ. Голланд бөх энэ тэмцээнд хүрэл медалийн төлөөх барилдаанд бүдэрсэн байна.
63 кг: Залуу тамирчин Б.Мөнгөнчимэг Буркина Фасогийн С.Небиг зовлон багатай иппон буулгаад Австрийн хашир туршлагатай бөх Х.Дрекслерт вазаригаар ялагдлаа. Б.Мөнгөнчимэг өнгөрсөн жил Абу Дабигийн гранпри тэмцээний дунд шөвөгт түүнийг хожиж байлаа. Өчигдөр тэмцээний хүнд жингийн барилдаанууд болсон.
Энэ өдөр эрчүүдээс Г.Алтанбагана, Г.Түвшинжаргал (81 кг), Б.Жанчивдорж, Х.Цогтгэрэл (90 кг), Д.Анар, Э.Энхбат (-100 кг), Х.Мөнхбаатар, Н.Батсуурь (+100 кг), эмэгтэйчүүдээс Ц.Цэрэнханд (70 кг), Б.Мөнхтуяа (-78 кг) нар дэвжээнд гарсан. Эхний өдрийн дараах байдлаар гурван алтан медальтай Франц багийн дүнгээр тэргүүлж, хоёр алт, гурван мөнгө, гурван хүрэлтэй Япон удаалж байна. Харин нэг алттай Монгол гуравт жагсаж байгаа юм. Эхний өдөр 13 улс ямар нэг медаль авчээ.
