Монголчууд 2012 онд хоёр сая 869.5 мянга болжээ. Үүнээс хоёр сая 762 мянга 381 нь Монгол Улсын нутаг дэвсгэрт амьдарч байгаа тухай урьдчилсан тооцоог Үндэсний статистикийн хорооноос гаргаад байна. Өнгөрсөн онд манай улсын хүн ам дунджаар 57 мянгаар нэмэгджээ.

Манай улсын хүн амын тоо 2010, 2011 онд дунджаар 1.7 хувиар өссөн бол өнгөрсөн жил 2.1 хувьд хүрлээ. Хүн амын тоо өсөх хандлага ажиглагдаж байна. “Хүн амын өсөлт ийм маягаар үргэлжилбэл Монгол Улсын гурван сая дахь иргэн 2016 онд төрөх тооцоолол хийсэн” гэж Үндэсний статистикийн хорооны Хүн ам, орон сууцны тооллогын товчооны дарга А.Амарбал сонирхуулав.

Манай улсын хоёр сая дахь иргэн 1988 онд төрөхөд улс даяар баярт үйл явдал болгон тэмдэглэсэн байдаг. Харин нэг сая дахь иргэн 1962 оны аравдугаар сард төрсөн байх магадлалтай гэнэ. Үзэл сурталжсан хуучин нийгмийн үед социалист улс орнууд хүн амынхаа тоог нууцалдаг байсан учир төр, засгийн удирдлагууд хүн нэмсний баярыг дараад өнгөрсөн бололтой.