Тамирчдын
тэсвэр, хатуужлыг шалгадаг алдарт “Дакар” раллид монголчуудаасаа анхлан
уралдсан хоёр тамирчны нэг Д.Болдбаатар техникийн саатлын улмаас
уралдааныг орхилоо. Чилийн Арикагаас Калама хотын хооронд болсон 767
км-ийн зургадугаар гараанд манай тамирчны мотоциклийн жолоо (руль) нь
хугарчээ. Түүнд нөөц жолоо байгаагүй тул уралдааныг орхихоос аргагүй
болсон байна. Хэрвээ байсан бол олон цаг хоцроод ч болов барианд орж,
дараагийн гараанаас уралдах боломжтой байсан гэнэ. Гэхдээ манай тамирчин
ямар нэг хүнд гэмтэл аваагүй аж. Хэдий эцсийн зорилгодоо хүрч чадаагүй ч
“Дакар”-т зориглон уралдсан Болдбаатартаа баяр хүргэх нь зүйтэй. Дараа
жил техникийн илүү сайн бэлтгэлтэй, илүү туршлагатай болоод даагаа нэхэх
биз ээ.
Харин ганц дайчин болсон Н.Лхамаа маань уралдаанаа үргэлжлүүлсээр байна. Тэрбээр зургадугаар гараанд лидерээс гурван цаг, 18 минут хоцрон 06:55:20 амжилтаар 132-р байр эзлэв. Улмаар уралдаан Чилээс Аргентин руу шилжсэн долдугаар гараанд (806 км) 03:23:59 үзүүлэлтээр 139-р байр эзэлсэн юм. Уншигч та бүхэн ийм хол зайг ийм богино хугацаанд яаж туулдаг байна хэмээн гайхаж магадгүй. Тухайн гарааны нийт зай 800 гаруй км боловч үүнээс тусгайлан заасан 220 км замынх нь үзүүлэлтээр тамирчдын цагийг гаргажээ. Тус гараанд түрүүлсэн Америкийн К.Каселли гэхэд дээрх зайг нэг цаг, 51 минутад туулсан юм.
Харин Аргентиний Сальтагаас Сан-Мигель-де-Тукуман хотын хооронд 849 км зайд болсон наймдугаар гараанд Н.Лхамаа 03:03:29 амжилтаар 106-р байр эзэллээ. Анх мотоциклийн төрөлд 196 тамирчин тоосоо өргөсөн ч явцын дунд хасагдсаар сүүлийн гараанд 139 хүн барианд оржээ. Найман гарааны дараах байдлаар мотоциклийн төр өлд “YAMAHA” хөлөглөсөн франц тамирчин Д.Касто 19:56:33 амжилтаар тэргүүлж, Португалийн Р.Фариа (20:07:49), Чилийн Ф.Лопес (20:08:33) удаалж байна. Испанийн Ж.Барредо гурван ч гараанд түрүүлсэн хэдий ч бусдад нь жигд сайн уралдааг үйн балгаар дөнгөж 41-д бичигдэж байна. Манай тамирчин Н.Лхамаа 31:33:38-аар 113-д жагсаж яваа юм.
Автомашины төрөлд 106 тамирчин уралдаанаа үргэлжлүүлж буйгаас Францын Петерансель/ Коттрегийн “Mini” баг 18:31:04 амжилтаар тэргүүлж, Катарын Аль Аттия, Испанийн Л.Крузийн “Buggy” баг аман хүзүүдэж явна.
Ачааны машины төрөлд 64 баг тунан үлдсэнээс Италийн “Iveco” 19:26:06 үзүүлэлтээр тэргүүн байрт гарч ирлээ. Энэ төрөлд олон жил ноёрхлоо тогтоосон Оросын “Камаз” (Николаев, Савостин, Рыбаков гэсэн бүрэлдэхүүнтэй) тэднээс 22 минутын алдагдалтай дэд байрт яваа бол Чехийн “Татра” (Коломы, Р.Килиан, Д.Килиан нарын жолоодсон) 20:07:31 амжилтаар гуравт хурдалж байна.
