Алдарт зохиолч Айн Рэндийг амжилтад хүргэсэн, амьд ахуйд нь тайзнаа амилсан цорын ганц жүжиг нь “Нэгдүгээр сарын 16-ны шөнө”. 1933 онд туурвисан энэхүү жүжгийг 1934 оны намар Холливудын “Плэйхауз” театрт, яг жилийн дараа “Бродвей”-д тоглон улмаар Лос Анжелес, Чикаго, Лондонд үзэгчдийн хүртээл болж, театр судлаач, шүүмжлэгчдийн зүгээс эерэг үнэлгээ авч байсан гэдэг. Тэгвэл эл жүжиг тун удахгүй монгол үзэгчдийн хүртээл болох гэж байна.

Сэтгүүлч, орчуулагч Б.Цацралын орчуулсан энэхүү бүтээлийг энэ сарын 16-нд тайзнаа тавихаар төрийн соёрхолт, гавьяат жүжигчин Д.Сосорбарам найруулж, “X Түц” хамтлагийн уран бүтээлчид ид сургуулилалж байна. Б.Цацрал Айн Рэндийн хоёр дахь жүжгийг ийнхүү орчуулсан бөгөөд эхнийх нь бүтээл болох “Төгс” жүжгийг өнгөрсөн хавар төрийн соёрхолт, гавьяат жүжигчин Д.Сосорбарам найруулж, тайзнаа тавьсан.

Айн Рэндийн гурван бүлэгт сэтгэлгээний эл драм, “Нэгдүгээр сарын 16-ны шөнө” жүжгийг ганцхан удаа тоглох бөгөөд NTV шууд дамжуулах гэнэ.