Оюутолгойн ордод түшиглэсэн баяжуулах үйлдвэрээ саяхан ажиллуулж эхэлсэн “Оюу толгой” компани Ханбогд сумын төвөөс баруун урд зүгт 36 км-т “Ханбумбат” нисэх буудлаа барьж дуусгажээ. Улсын комисс хүлээж авснаар энэ оны эхний улиралд уг нисэх буудал ашиглалтад орох гэнэ. Нисэх буудлыг барихад “Арц суварга” компани болон Монголын инженер, техникийн 700 гаруй мэргэжилтэн оролцжээ. Монгол гэрийн хэв маягийг санагдуулахуйц архитектор бүхий алт, зэсийн өнгөөр “чимсэн”, олон улсын стандартад нийцсэн “Ханбумбат” нисэх буудлын хөөрч буух зурвас 3250 метр урт, 45 метр өргөн аж. Ийм урттай нисэх зурвасын барилгын ажлыг нэг улиралд багтаан гүйцэтгэсэн нь Азидаа том амжилт гэнэ.

Манай улсын “Мөрөн”, “Ховд” зэрэг орон нутгийн томоохон нисэх буудлын зурвас 2800 метр урт байдаг билээ. “Ханбумбат” нь цагт 240 зорчигч хүлээн авах хүчин чадалтай, “Боинг 737” зэрэг иргэний тээврийн болон ачааны онгоц нисэх зурвасын аль ч талаас бууж, хөөрч болох давуу талтай. Сонирхуулахад, тус компанийнхан Монголд өмнө нь байгаагүй асфальт дэвсэгч төхөөрөмж, 85000 шоо метр бетон цутгахын тулд Америкт үйлдвэрлэсэн “Gomako” зуурмагийн машин гээд дэлхийн шилдэг тоног төхөөрөмжүүдийг ашигласан гэнэ. Энэхүү бүтээн байгуулалтад нийтдээ 2.5 тэрбум төгрөг зарцуулжээ.