Монголын иргэний нисэхийн салбар нисэхийн мэдээллийн үйлчилгээний чиглэлээр Ази, Номхон далайн бүсдээ тэргүүлэгчдийн эгнээнд багтах болжээ. 2010 онд Олон улсын иргэний нисэхийн байгууллага (ИКАО)-аас Монгол Улсын иргэний нисэхийн салбарын үйл ажиллагаанд хийсэн аюулгүй ажиллагааны өргөтгөсөн аудит шалгалтад манай иргэний нисэхийн байгууллага амжилттай дүн үзүүлсэн. Улмаар ИКАО, COSCAP зэрэг олон улсын мэргэжлийн байгууллагаас бүсийн төвүүдэд монгол мэргэжилтэн ажиллуулах, USOAP хөтөлбөрт шалгагч авах саналыг манай талд тавиад буй гэнэ. Түүнчлэн манай мэргэжилтнүүд өмнө нь гадаадын багш нараар заалгадаг байсан бол, одоо гаднын мэргэжил нэгтнүүддээ зааж сурган, мэдлэг оюунаа түгээх чадвартай болжээ.

ИНЕГ-ын Нислэгийн мэдээллийн үйлчилгээний алба COSCAP олон улсын байгууллагатай хамтран нисэхийн мэдээллийн үйлчилгээний олон улсын анхан шатны сургалтыг өчигдөр “Жаргалант” цогцолборт эхлүүллээ. Анх удаа манайд зохион байгуулж, Монголын иргэний нисэхийн мэргэжилтнүүдийн багшилж буй эл сургалтад өөрийн орноос гадна Ази, Номхон далайн бүсийн Малайз, БНАСАУ, Тайланд зэрэг орны иргэний нисэхийн салбарын 15 мэргэжилтэн оролцож байгаа юм. Энэ сарын 7-11-нд зохион байгуулах тус сургалтыг дэлхийн нэртэй агаарын хөлөг үйлдвэрлэгч “Аэробус” компани ивээн тэтгэжээ.

Дашрамд сонирхуулахад, манай улсын агаарын зайд үйлдсэн нийт нислэгийн тоо 2012 онд 100.083-т хүрч, өмнөх жилийн мөн үетэй харьцуулахад 7.7 хувиар өсчээ. Үүнээс манай улсын нутаг дэвсгэрээр дайран өнгөрч буй нийт нислэгийн тоо 82627-д хүрсэн нь өнгөрсөн оны мөн үеэс 6,0 хувиар ахисан үзүүлэлт гэнэ.