Автсрийн “Интерспот фильм” студи 2006 онд бүтээсэн “Монголын гайхамшиг” баримтат киноны монгол хэл дээр орчуулсан хувилбарыг, зохиогчийн эрхийг эзэмших эрхийн хамт өчигдөр БОНХ-ийн сайд С.Оюунд гардуулан өглөө. Монгол орны ховор амьтан, ургамал, дэлхийд гайхагдах өвөрмөц тогтоц бүхий байгалийн бүс бүслүүрийн төлөөлөл болох улсын тусгай хамгаалалттай газар нутгаар “Монголын гайхамшиг” баримтат киног хийжээ.

Түүнчлэн уг кино өнгөрсөн хугацаанд Олон улсын зэрлэг амьтдын кино наадмын “Хамгийн сайн зураглалын шагнал”, Франц улсад зохиогддог Олон улсын уулын 15 дугаар кино наадмын шүүгчийн шагнал, Испанийн Тореллын уулын кино наадмын “Цагаан уул цэцгийн мөнгөн шагнал” хүртсэн байна.

“Монголын гайхамшиг” баримтат киноны зохиолч найруулагч Хайнц Лэгер “Азийн зүрхэнд орших Монгол орны онгон байгалийн хараа булаам дүр төрхийг дахин давтагдашгүй зургуудаар гаргахыг бид хичээсэн. Умар зүг Сибирийн хөвч тайгаас өмнө тийш Хятадын Цагаан хэрэм хүртэл өргөн уудам газар нутагтай энэ орон олон төрлийн зэрлэг амьтдын амьдрах нутаг нь болдог юм. Зүүн Монголын тал нутаг тэнгэрийн хаяатай нийлсэн байдаг бол сүрлэг голууд нь хойд зүгт Байгаль нуур, Япон тэнгист цутгадаг. Энэ киног бүтээхдээ би Монгол орон ер бусын гайхамшгаар дүүрэн гэдгийг бие сэтгэлээрээ мэдэрсэн” хэмээн ярив.

Тус студи нь байгаль болон экосистемийн онцлогийг харуулсан өндөр нягтшилтай зураглалын бүрэн хэмжээний байгалийн баримтат кинонууд, Австрийн телевизийн өдөр тутмын нийгэм, танин мэдэхүйн нийтлэл, теле сэтгүүл хийдгээрээ нэртэй аж. Мөн “Монголын гайхамшиг” баримтат киноны хоёрдугаар бүлгийг 2014 онд хийхээр төлөвлөсөн бөгөөд бэлтгэл ажлаа ирэх оноос эхлэх юм байна.