Ж.Золбаяр буюу Амай энэ сарын 21-нээс Азийн орнуудаар аялахаар болжээ. Түүнийг үдэн гаргах ёслол өчигдөр Гадаад харилцааны яаманд болсон юм. Эл арга хэмжээнд Ерөнхий сайд Н.Алтанхуяг, Гадаад харилцааны сайд Л.Болд, Кёкүшюзан Д.Батбаяр болон албаны хүмүүс, гэр бүлийнхэн нь ирсэн байв. Ерөнхий сайд Н.Алтанхуяг “Залуучуудын заавал унших номын нэг нь “Монгол бадарчин” цуврал ном. Гурван цуврал номыг нь бүх аймаг, суманд хүргэх ажлыг зохион байгуулна. Аялалд нь амжилт хүсье” гэв.

Амай энэ удаа найз Д.Энхтайваны хамт аяллаа Хонконгоос эхлэхээр төлөвлөж, зургаан сараас хоёр жилийн хугацаанд явах юм байна. Тэрбээр “Залуу хүн их юм хийж, бас олон зүйл үзэх хэрэгтэй. Би жирийн л нэг залуу. Хүсэх юм бол хэн ч, юуг ч хийж чадна гэдгийг монголчууддаа харуулахыг зорьж аялдаг” гэв. Амай 2005 оноос эхлэн Европ, Африкийн улс орноор, мөн АНУ-ын бүх мужаар аялжээ. Энэ хугацаанд 70 гаруй улсын 400 орчим хотод очсон байна. Тэрбээр монгол хүний хөл хүрээг үй газар Төрийнхөө далбааг мандуулдаг аж.

Мөн дэлхийн уур амьсгалын өөрчлөлт, ховордсон ан амьтан, хотжилттой холбоотой тулгамдаж буй асуудлуудын талаар судалгаа хийн аяллынхаа тухай “Монгол бадарчин” цуврал ном бичсэн юм. Нийт есөн ном бичих бөгөөд аяллаас ирээд дараагийн номуудаа гаргаж, мөн фото зургийн үзэсгэлэн зохион байгуулна гэсэн.

Энэ удаагийн аяллын нэг онцлог нь дүрс бичлэг хийж, www.amai.mn цахим хаягаар өдөр бүр 09.00-23.00 цагийн хооронд хаана, юу хийж байгаагаа шууд хүргэж байх аж.